Conte drejt rikthimit te stoli i Italisë, dy emra “big” për trajnerin e ri të Napolit

Antonio Conte pritet të largohet në fund të këtij sezoni nga Napoli, për t’u rikthyer te stoli i Italisë. 56-vjeçari është kandidati kryesor për të marrë drejtimin e “Axurrëve” pas dështimit për t’u kualifikuar në Botëror. Më parë duhet të zgjidhet kreu i ri i FIGC dhe më pas do të vendoset për trajnerin e kombëtares.

Ndërkohë, “Il Mattino” zbulon se Aurelio De Laurentiis ka në mendje dy emra për trajnerin e ri të Napolit. Bëhet fjalë për dy trajnerë me peshë në historinë e futbollit italian dhe jo vetëm. Njëri prej tyre ka qenë i suksesshëm edhe në Angli.

I pari është Maurizio Sarri, i cili drejtoi një nga ekipet më emocionuese të Napolit, mes viteve 2015-2018. I dyti është Roberto Mancini, i cili është aktualisht në krye të Al-Sadd në Katar, ku është në prag të fitimit të titullit të ligës, por nuk e ka hedhur poshtë mundësinë për t’u rikthyer në Serie A.