Daçiç: Mbi 30.000 ndërhyrje të zjarrfikësve këtë vit, u shpëtuan 823 persona

Beograd, 18 shtator – Ministri i Brendshëm i Serbisë në detyrë, Ivica Daçiç, bëri të ditur se pjesëtarët e Sektorit për Situata Emergjente kanë pasur mbi 30.000 ndërhyrje gjatë këtij viti, nga të cilat mbi 22.000 kanë qenë zjarre, ndërsa kanë shpëtuar 823 persona. Deklaratën e dha në Akademinë solemne me rastin e Ditës së Sektorit për Situata Emergjente.

Daçiç falënderoi zjarrfikësit dhe shpëtimtarët për punën e tyre. “Ju keni qenë çdo herë aty ku duhej dhe prandaj sot është më e rëndësishmja t’ju them atë që ndoshta nuk e dëgjoni shpesh… Faleminderit për gjithçka që bëni dhe për gjithçka që keni bërë për qytetarët e Serbisë”, tha ai, sipas njoftimit të Ministrisë së Punëve të Brendshme të Serbisë.

Sipas ministrit, ky vit do të mbahet mend për zjarret e mëdha në Rërën e Deliblatës, në malin Stolovi dhe në malin Suva. Ai tha se duhet të nxirren mësime nga gjithçka që ka ndodhur: nevojiten më shumë njerëz dhe më shumë teknikë, si dhe duhet rritur numri i pjesëtarëve të Sektorit për Situata Emergjente. “Investimi në zjarrfikës, polici dhe ushtri është investim në të ardhmen e Serbisë. Nuk bëhet fjalë për militarizim, por për të qenë të sigurt se do të ketë dikush që do të na shpëtojë nga zjarret apo katastrofat natyrore”, u shpreh Daçiç.

Ministri falënderoi gjithashtu ekipet ndërkombëtare nga Gjermania, Hungaria dhe Rumania që morën pjesë në fikjen e zjarreve, ekuipazhin e avionit “Iljushin” që hodhi 2.700 tonë ujë, si dhe ekuipazhet e katër helikopterëve nga vende të ndryshme. Në ceremoni u ndanë distinktivë të artë të Sektorit për Situata Emergjente dhe pllakëte për zjarrfikës-shpëtimtarë të dalluar, pilotin e Njësisë së Helikopterëve dhe përfaqësuesit e ekipeve ndërkombëtare që morën pjesë në shuarjen e zjarreve në Serbi.

Burimi: Danas