Daniel Craig do të jetë përsëri në rolin e agjentit sekret, James Bond

Pas shumë spekulimesh, pohimesh dhe konfirmimesh, aktori britanik Daniel Craig tha se do të rikthehet sërish në ekranin e madh, në rolin e agjentit sekret më të famshëm në botë, James Bond.

Craig ishte i ftuar në programin “The Late Show” të Stephen Colbert, i cili e pyeti nëse do të luante sërish rolin e Bond. Përgjigjja ishte “po”.

Daniel Craig ka qenë protagonist në 4 filma të James Bond, por deri tani kishte refuzuar të konfirmonte nëse do ta bënte sërish. Por në shfaqjen e “The LateShow”, ai tha se e dinte këtë prej dy muajsh.

Craig u shpreh se, pas 4 filmave Bond kishte nevojë për një pushim, por pas një reflektimi të thellë kishte vendosur ta bënte sërish, ndërsa theksoi se kjo do të jetë hera e fundit që luan rolin e agjentit sekret.

Filmi i radhës i sagës James Bond, i 25-ti në seri, është parashikuar të shfaqet për publikun në nëntor të vitit 2019.