Der Spiegel: BE i ofron Shqipërisë dhe Maqedonisë perspektivën e anëtarësimit

”Nëse gjithçka shkon mirë Serbia dhe Mali i Zi do të anëtarësohen deri në vitin 2025”, shkruan gazeta.

”Por, në të njëjtën kohë Brukseli paralajmëron kundër shpresave të ekzagjeruara”, shton ajo.

”Shqipërisë dhe Maqedonisë do t’i ofrohet perspektiva e anëtarësimit. Parashikimi për Kosovën dhe Bosnje-Hercegovinën duket më i kufizuar”, thotë ”Der Spiegel”.

Juncker: BE duhet t’u shtrijë dorën partnerëve tanë në Ballkanin Perëndimor

Presidenti i Komisionit Europian, Jean-Claude Juncker deklaroi sot se BE-ja duhet të ndihmojë vendet e Ballkanit Perëndimor për të ecur drejt anëtarësimit.

“Të gjitha këto vende janë shumë larg nga plotësimi i kushteve”, deklaroi Juncker.

“Por, ne duhet t’u shtrijmë dorën partnerëve tanë në Ballkanin Perëndimor, ne duhet t’i ndihmojmë ato… drejt kësaj rruge të vështirë”, shtoi ai.

Juncker gjithashtu tha se vendet kandidate duhet të zgjidhin konfliktet kufitare përpara se të anëtarësohen në BE.

Unioni po merret ende me një konflikt kufitar mes vendeve të tij anëtare, Sllovenisë dhe Kroacisë.

“Nuk duhet të ndodhë sërish”, tha Juncker.

”Këto probleme duhet të zgjidhen përpara anëtarësimit, përndryshe nuk do të ketë më të tilla”, përfundoi ai.

Juncker paralajmëroi sot shtetet e Ballkanit se nuk mund t’i bashkohen BE-së përpara zgjidhjes së mosmarrëveshjeve kufitare dhe saktësoi se 2025 për anëtarësimin ishte një ‘tregues’.

“Nuk do të ketë zgjerim të mëtejshëm të vendeve të Ballkanit pa një zgjidhje paraprake të problemit të kufijve, përpara çdo anëtarësimi’’, deklaroi Juncker përpara eurodeputetëve të mbledhur në seancë plenare në Strasburg.

BE-ja ka nisur bisedimet e anëtarësimit me Serbinë në fillim të 2014 dhe me Malin e Zi në 2012. Presidenti i Komisionit Evropian u shpreh në nëntor se besonte që këto dy shtete do të jenë anëtare të Bashkimit Evropian përpara 2025.

Është e pavërtetë që unë apo Komsioni të jemi shprehur se deri në 2025 anëtarësimi i Serbisë dhe i Malit të Zi duhet të jetë zgjidhur. Ky është një vit tregues”, sqaroi në Strasburg Juncker.

“Unë do të doja që shtetet e Ballkanit të anëtarësohen në momentin e përmbushjes së kushteve. Nuk ështe ende rasti në këto momente, këto shtete janë ende larg përmbushjes së kushteve për anëtarësimin në BE.

Kryediplomatja e Bashkimit Evropian, Federica Mogherini prezantojë përpara Parlamentit Evropian sot pasdite strategjinë për zgjerimin në BE të shteteve të Ballkanit Perëndimor.