Dita Ndërkombëtare e Demokracisë

Dita Ndërkombëtare e Demokracisë, e cila shënohet çdo 15 shtator, shërben si një mundësi për të reflektuar mbi gjendjen e demokracisë në botë.

Sekretari i përgjithshëm i OKB-së, António Guterres, theksoi në këtë ditë, rëndësinë e përfshirjes së qytetarëve në vendimmarrje përmes dialogut, bashkëpunimit dhe dëgjimit të pikëpamjeve të ndryshme. OKB-ja nënvizon se demokracia nuk është vetëm një objektiv, por edhe një proces që kërkon pjesëmarrjen e plotë të institucioneve, shoqërisë civile dhe qytetarëve.

“Sa herë që zgjedhim dialogun në vend të ndarjes dhe bashkëpunimin në vend të konfrontimit, ne forcojmë demokracinë”, deklaroi Guterres.

Në këtë ditë, OKB-ja rikujton gjithashtu rëndësinë e lirisë së shprehjes, të garantuar nga neni 19 i Deklaratës Universale të të Drejtave të Njeriut, si një e drejtë themelore për çdo individ.

OKB-ja do të zhvillojë në selinë e saj një aktivitet kushtuar demokracisë pjesëmarrëse, duke u fokusuar te mënyrat se si zëri i qytetarëve mund të forcojë besimin, transparencën dhe llogaridhënien në qeverisje.