Dosja “Plumbi i Artë”, ish-zv.drejtori i Policisë së Elbasanit vijon dëshminë në GJKKO

Edhe këtë të enjte është zhvilluar në Gjykatën e Posaçme seanca e radhës e dosjes “Plumbi i Artë”, ku me kërkesë të avokatëve po pyeten dëshmitarët e

Edhe këtë të enjte është zhvilluar në Gjykatën e Posaçme seanca e radhës e dosjes “Plumbi i Artë”, ku me kërkesë të avokatëve po pyeten dëshmitarët e thirrur në proces.

Në seancë është paraqitur sërish ish-zv.drejtori i Policisë së Elbasanit, Krenar Guçe, i transferuar së fundmi si shef rendi në Komisariatin e Përmetit, i cili vijoi dëshminë e tij para trupit gjykues.

Gjatë dëshmisë, Guçe u shpreh se gjatë kohës që ushtronte detyrën në Policinë e Shtetit është thirrur nga ish-drejtori Gledis Nano, në prani të Tonin Vocajt, ku i është bërë me dije se disa persona kishin pasur qëllime dashakeqe ndaj tij dhe për këtë arsye i ishte vendosur mbrojtje fizike.

Ai deklaroi gjithashtu se ka kryer verifikime lidhur me shtetasin Hajdar Bako në kuadër të hetimeve për vrasjen e Andi Zylyfit. Sipas tij, për verifikime në Rinas është urdhëruar nga eprorët, ndërsa shtoi se nuk i kujtohet të ketë kryer kontrolle ndaj Talo Çelës.

Guçe tha se për veprimet hetimore në Rinas ka njoftuar eprorin e tij, Leonard Palushi. Ai shtoi se Hajdar Bako e ka identifikuar fillimisht nga targa e automjetit dhe sistemi TIMS.

I pyetur për lidhje apo njohje me Nuredin Dumanin, Guçe deklaroi se nuk ka pasur asnjë kontakt me të dhe se gjatë hetimeve nuk është takuar asnjëherë me të. Sipas tij, Nuredin Dumani është shpallur në kërkim si person i dyshuar për vrasjen e Bujar Çelës.

Sa i përket Henrik Hoxhajt, Guçe u shpreh se e njeh vetëm pasi është arrestuar dhe ka dalë në media.

Seanca në këtë proces vijon me pyetjen e dëshmitarëve të tjerë.