Dy përfaqësues të rinj të PS-së reagojnë pasi Marjana Koçeku njoftoi se do jetë deputete e pavarur: Dorëzo mandatin

Dalja e Marjana Koçekut nga grupi parlamentar i Partisë Socialiste dhe vendimi i saj për të vijuar si deputete e pavarur ka sjellë reagimet e para nga përfaqësues të rinj të socialistëve.

Mes tyre ishte edhe studentja Helena Kaçe, e cila u bë e njohur pasi hapi Kongresin e Partisë Socialiste, ku kryeministri Edi Rama e cilësoi si një nga figurat që përfaqësojnë brezin e ri të partisë.

Në një reagim në rrjetet sociale, Kaçe e konsideroi vendimin e Koçekut si një akt të papajtueshëm me mandatin e marrë nën siglën e PS-së, duke theksuar se “pavarësia e vërtetë nis me dorëzimin e mandatit”.

“Pavarësia e vërtetë nuk nis duke dorëzuar teserën e duke mbajtur karrigen. Nis duke dorëzuar mandatin. Nëse idealet e tua nuk përkojnë më me atë shtëpi politike, hapi më parimor është t’ua kthesh mandatin atyre që të besuan”, shkruan Kaçe, teksa i uron suksese Koçekut në rrugëtimin e saj politik si e pavarur.

Një reagim ka ardhur edhe nga Alfred Muharremi, një tjetër përfaqësues i brezit të ri të socialistëve, i cili vlerësoi të drejtën e Koçekut për të ndjekur një kauzë tjetër politike, por ngriti pikëpyetje mbi kohën e këtij vendimi.

Sipas Muharremit, kauzat që deputetja deklaron se po përfaqëson sot kanë qenë të njohura edhe më herët, ndërsa ai theksoi se Koçeku ka pasur mundësinë t’i artikulojë dhe t’i mbrojë ato nga foltorja e Kuvendit.

“Nëse beson se nuk përfaqëson më Partinë Socialiste, atëherë akti politik nuk mbaron te dorëzimi i teserës, por te dorëzimi i mandatit”, shkruan ai.

Muharremi shton se mandati është një besim i dhënë nga qytetarët dhe nga forca politike nën siglën e së cilës është fituar, ndaj sipas tij largimi nga PS duhet të shoqërohet edhe me heqjen dorë nga mandati parlamentar.

Marjana Koçeku njoftoi këtë të diel largimin nga grupi parlamentar i Partisë Socialiste dhe vijimin e aktivitetit të saj politik si deputete e pavarur, një vendim që ka hapur debat brenda kampit socialist.