Filipçe nga mitingu përmbyllës në Bërvenicë: Po vjen koha e së vërtetës, Mickoski dhe VMRO-ja do të përgjigjen

Kryetari i SDSM-së, Venko Filipçe, sonte nga mitingu përmbyllës në Bërvenicë porositi se po vjen koha e së vërtetës dhe e drejtësisë dhe se kryeministri Hristijan Mickoski dhe VMRO-ja e tij do të përgjigjen, siç njofton Fokus.

Sipas Fokus, Filipçe tha se Mickoski, përmes fushatave të zeza, sulmeve dhe përpjekjeve për ta heshtur opozitën, kërkon ta pengojë SDSM-në ta demaskojë pushtetin, dhe shtoi se nuk do të heqë dorë nga lufta dhe se do të vijë koha e përgjegjësisë për krimin dhe korrupsionin e pushtetit.

Ai iu përgjigj deklaratës së Mickoskit në tubimin në Miletinë para disa ditësh, ku kryeministri kishte thënë se SDSM-ja duhet shkatërruar: Filipçe tha se Mickoski e dëshiron këtë sepse i frikësohet opozitës së vetme të fortë dhe të besueshme, e cila nuk është nën kontrollin e tij, dhe se kryeministri do të përgjigjet para qytetarëve dhe para Prokurorisë Evropiane.

Filipçe shtoi, sipas Fokus, se në vend që të përballet me kritikat, Mickoski përpiqet ta diskreditojë opozitën me fyerje, kërcënime dhe sulme mediatike e përmes “satelitëve” të rinj politikë.

Në mbyllje ai porositi se të gjitha këto përpjekje janë të kota: SDSM-në askush nuk mund ta shkatërrojë, ajo mbetet me qytetarët, punëtorët, bujqit, pensionistët dhe të rinjtë që duan të qëndrojnë në vend, si dhe e përkushtuar ndaj të ardhmes evropiane, bashkëjetesës dhe mbështetjes për të pambrojturit.