FOKUS – Alarm demografik në BE, popullsia drejt tkurrjes deri në fund të shekullit

– Në Evropë, mosha mesatare do të vazhdojë të rritet, ndërsa popullsia do të fillojë të bjerë. Ky është përfundimi që del nga raporti i tretë mbi transformimin demografik, i publikuar sot nga Komisioni Evropian dhe i hartuar nga Qendra e Përbashkët Kërkimore (Joint Research Centre), shkruan il messaggero.it.

Dokumenti vë në dukje se popullsia e Kontinentit të Vjetër ka arritur tashmë kulmin dhe tani është e destinuar të tkurret në dekadat e ardhshme.

Një “rënie e ngadaltë”, e cila do të nisë zyrtarisht në vitin 2029, kur popullsia e Bashkimit Evropian do të arrijë kulmin prej 453,3 milionë banorësh.

Sipas parashikimeve, banorët e Bashkimit Evropian do të kalojnë nga 450,6 milionë aktualisht në rreth 445 milionë në vitin 2050, për të zbritur në 398,8 milionë deri në vitin 2100.

Bëhet fjalë për një rënie të përgjithshme prej rreth 11,7%, duke e rikthyer popullsinë në nivelet e viteve ’70. Megjithatë, kjo rënie do të shoqërohet me një rritje të vazhdueshme të jetëgjatësisë mesatare.

Gjatë së njëjtës periudhë, gati një në tre evropianë do të jetë të paktën 65 vjeç, krahasuar me një në pesë që është sot. Ndërkohë, jetëgjatësia mesatare pritet të kalojë 90 vjet për gratë dhe 86 vjet për burrat deri në vitin 2100.

Ky zhvillim është dëshmi e përparimeve në fushën e shëndetësisë, e përmirësimit të standardit të jetesës dhe e kushteve sociale.

Megjithatë, ai mund të ushtrojë presion mbi tregun e punës, sistemet shëndetësore, shërbimet e kujdesit dhe financat publike. Këtë e nënvizon Komisioni Evropian, i cili evidenton gjithashtu edhe mundësitë që lidhen me të ashtuquajturën “ekonomia e jetëgjatësisë”, me tregje të reja dhe inovacione të dedikuara për popullsinë e moshuar.

Vëmendje e veçantë i kushtohet edhe normave të fertilitetit, të cilat në vendet e Bashkimit Evropian kanë rënë vazhdimisht që nga mesi i viteve ’60 deri në fillim të këtij shekulli, duke mbetur për dekada të tëra shumë poshtë nivelit prej 2,1 fëmijësh për grua, i nevojshëm për të mbajtur popullsinë të qëndrueshme në mungesë të migracionit.