FOKUS – Jordania dhe Bahreini zmbrapsin sulme të reja ajrore iraniane

KAJRO, 24 korrik /ATSH-DPA/ – Jordania njoftoi sot se ka interceptuar raketa dhe dronë të tjerë iranianë, që synonin territorin e saj, në valën më të fundit të sulmeve ndaj këtij vendi aleat të Shteteve të Bashkuara të Amerikës.

Ushtria jordaneze bëri të ditur se sistemet e mbrojtjes ajrore rrëzuan shtatë raketa dhe gjashtë dronë të lëshuar nga Irani, raportoi agjencia shtetërore e lajmeve “Petra”.

Sipas një burimi ushtarak, nga ndërhyrja nuk pati viktima dhe as dëme materiale, pa dhënë detaje të tjera.

Edhe ushtria e Bahreinit njoftoi se mbrojtja e saj ajrore neutralizoi disa sulme ajrore iraniane.

Autoritetet e mbretërisë së Gjirit, ku ndodhet Flota e Pestë e Marinës së SHBA-së, nuk dhanë informacione mbi objektivat e sulmuara apo dëmet e mundshme.

Më herët gjatë ditës së sotme, në Bahrein u dëgjuan dy herë sirenat e alarmit ajror.

Ministria e Brendshme u bëri thirrje banorëve të qëndrojnë të qetë dhe të strehohen në vende të sigurta.

Bahreini dhe vende të tjera të rajonit, që strehojnë baza ushtarake amerikane, janë vënë vazhdimisht në shënjestër të sulmeve hakmarrëse iraniane, pas goditjeve të SHBA-së ndaj Iranit, të cilat kanë vijuar që nga shkurti. /