FOKUS – Misioni i BE-së paralajmëron rrezik të madh për anijet tregtare në Detin e Kuq

ATHINË, 24 korrik /ATSH-DPA/- Operacioni detar i Bashkimit Evropian ASPIDES përditësoi sot vlerësimin e sigurisë për Detin e Kuq, pas sulmit të milicisë Houthi ndaj një naftëmbajtëseje saudite në fillim të javës.

Sipas selisë së misionit në Larisa të Greqisë, niveli i kërcënimit në ngushticën Bab al-Mandab, pranë brigjeve të Jemenit, dhe në pjesën jugore të Detit të Kuq është rritur nga “mesatar” në “i lartë”.

Për pjesën veriore të Detit të Kuq dhe Gjirin e Adenit, niveli i rrezikut mbetet “mesatar”.

Misioni evropian tha se konfliktet që vazhdojnë në rajon – veçanërisht lufta që po zgjerohet mes SHBA-së, Izraelit dhe Iranit – kanë ndryshuar ndjeshëm situatën e sigurisë dhe se rreziku i një përshkallëzimi të mëtejshëm mbetet i lartë.

“Nëse forcat Houthi vazhdojnë të kërcënojnë transportin tregtar, veçanërisht anijet që mund të konsiderohen të lidhura me konfliktin aktual në Lindjen e Mesme”, thuhet në deklaratën e misionit.

Milicia Houthi shpalli të hënën një “bllokadë” ndaj lundrimit detar të Arabisë Saudite.

Po atë natë, një naftëmbajtëse saudite u sulmua në Detin e Kuq dhe në bord shpërtheu zjarr.

“Rebelët Houthi deklaruan se kishin sulmuar dy anije-cisternë, pasi sipas tyre ato kishin shkelur bllokadën e shpallur prej tyre”, raportoi agjencia e lajmeve “Saba”, e kontrolluar nga kjo milici.

Misioni ASPIDES paralajmëroi se sulme të tjera ndaj anijeve tregtare nuk mund të përjashtohen.

Rreziku më i madh lidhet me përdorimin e raketave kundër anijeve, dronëve ajrorë pa pilot, mjeteve detare pa pilot si dhe anijeve të vogla sulmuese.

BE-ja u bëri thirrje kompanive dhe ekuipazheve detare, të zbatojnë me kujdes masat ekzistuese të sigurisë, të mbajnë kontakt me qendrat e sigurisë detare dhe ta marrin parasysh nivelin aktual të rrezikut gjatë planifikimit të udhëtimeve.

Operacioni ASPIDES rekomandon që anijet të shmangin plotësisht ujërat territoriale të Jemenit dhe, kur është e mundur, të lundrojnë më pranë brigjeve afrikane, për të ulur rrezikun e sulmeve.

Edhe sekretari i përgjithshëm i OKB-së, António Guterres, shprehu shqetësim për zhvillimet e fundit.

Ai tha se ishte “thellësisht i alarmuar” nga rikthimi i sulmeve të milicisë Houthi, duke paralajmëruar se mund të rriten më tej tensionet në rajon. /