FOKUS – SHBA dhe Irani bien dakord të zgjasin armëpushimin 60-ditor

TEHERAN, 12 gusht /ATSH – AA/ – SHBA-ja dhe Irani kanë “rënë dakord” të zgjasin armëpushimin 60-ditor sipas Memorandumit të Mirëkuptimit të Islamabadit, pasi marrëveshja pritet të skadojë më 17 gusht, thanë sot burime qeveritare pakistaneze.

“Të dyja palët u kanë përcjellë pëlqimin e tyre tek ndërmjetësit për të zgjatur afatin”, tha një burim i afërt me procesin e ndërmjetësimit.

“Megjithatë, të dyja palët po shkëmbejnë mesazhe për të vendosur për periudhën e zgjatjes”, shtoi burimi.

SHBA-ja dhe Irani ranë dakord për armëpushim të ndërmjetësuar nga Pakistani në prill dhe më vonë nënshkruan memorandum mirëkuptimi më 17 qershor, duke nisur negociatat drejt marrëveshjes përfundimtare. Megjithatë, bisedimet më vonë ngecën për shkak të mosmarrëveshjeve mbi garancitë e sigurisë dhe lirinë e lundrimit përmes Ngushticës së Hormuzit, një nga rrugët më strategjike në botë për furnizimin dhe tregtinë globale të energjisë.

Midis 8 dhe 24 korrikut, SHBA-ja dhe Irani shkëmbyen sulme ushtarake, ku Washingtonin nisi sulme ndaj objektivave brenda Iranit ndërsa Teherani iu përgjigj duke goditur ato që i përshkroi si objekte dhe pajisje ushtarake amerikane në disa vende arabe, përfshirë Jordaninë, Bahreinin dhe Kuvajtin.