FOKUS – SHBA-ja dhe Gjermania forcojnë bashkëpunimin në prodhimin e armëve

UASHINGTON, 15 shtator /ATSH-DPA/- Ministri gjerman i Mbrojtjes, Boris Pistorius dhe homologu i tij amerikan, Pete Hegseth nënshkruan sot një deklaratë qëllimi, për të rritur bashkëpunimin mes dy vendeve, në projektet e armatimeve dhe prodhimin e pajisjeve ushtarake.

Ministria gjermane e Mbrojtjes tha se sfidat aktuale të sigurisë, kërkojnë që Gjermania dhe SHBA-ja, të kenë një bashkëpunim më të fortë dhe më të lidhur mes industrive të tyre të mbrojtjes, në të dyja anët e Atlantikut.

Të dyja vendet kanë industri të fuqishme të mbrojtjes dhe synojnë t’i bashkojnë më shumë kapacitetet e tyre, për prodhimin e armëve moderne, pjesëve të tyre dhe municioneve të avancuara.

Kërkesa e lartë për pajisje ushtarake kërkon rritjen e kapaciteteve të prodhimit, dërgesa më të shpejta dhe furnizim të qëndrueshëm në SHBA dhe Evropë.

Kjo synon të garantojë që vendet aleate të kenë pajisjet dhe municionet e nevojshme dhe që forcat e tyre të jenë gjithmonë të gatshme për veprim.

Ministria gjermane tha se deklarata e qëllimit, krijon një kuadër politik për projektet e ardhshme mes dy vendeve.

Bashkëpunimi do të përfshijë ndërtimin, prodhimin, prodhimin me licensë dhe mirëmbajtjen e pajisjeve ushtarake.

Gjithashtu synohet forcimi i zinxhirëve të furnizimit, rishikimi i rregullave për transferimin e teknologjive ushtarake dhe rritja e bashkëpunimit në kërkimin dhe zhvillimin e teknologjive të reja të mbrojtjes. /