FOKUS – SHBA shënon 250-vjetorin e Pavarësisë me festime madhështore mbarëkombëtare

UASHINGTON, 4 korrik /ATSH-DPA/ – Shtetet e Bashkuara shënojnë sot 250-vjetorin e pavarësisë së tyre nga Britania e Madhe duke festuar këtë moment historik me shfaqje ajrore, një shfaqje fishekzjarresh rekord dhe një fjalim të gjatë nga presidenti Trump.

Evente janë planifikuar në të gjithë vendin, me festime të mëdha që do të zhvillohen në qytete duke përfshirë Nju Jorkun, Bostonin dhe Los Anxhelesin.

Në kryeqytet, Uashington, festimet fillojnë me një paradë të Ditës së Pavarësisë përgjatë National Mall në mëngjes, e ndjekur nga një ditë ngjarjesh përkujtimore.

Avionë luftarakë dhe helikopterë do të fluturojnë mbi Uashington gjatë gjithë ditës, me organizatorët që thonë se janë planifikuar më shumë se 30 fluturime.

”Air Force One”, avioni zyrtar i qeverisë, është planifikuar të bashkohet me spektaklin, duke fluturuar së bashku me bombarduesit amerikanë mbi kryeqytet.

Pavarësisht temperaturave që parashikohen të arrijnë rreth 42 gradë Celsius, presidenti Donald Trump tha se planifikon ta shënojë rastin duke mbajtur “një fjalim vërtet të gjatë, vetëm për të treguar se mund të bëjë gjithçka”.

Krahas fjalimit të presidentit, programi i mbrëmjes përfshin një shfaqje fishekzjarrësh që pritet të thyejë një rekord botëror, me 850 000 fishekzjarrë që do të lëshohen në 10 vende gjatë afërsisht 40 minutave.

Dita e Pavarësisë përkujton miratimin e Deklaratës së Pavarësisë së Shteteve të Bashkuara më 4 korrik 1776, kur 13 kolonitë amerikane shpallën pavarësinë e tyre nga Britania e Madhe./  a.jor.