FOKUS – Uashingtoni dhe Londra planifikojnë bisedime për sigurinë në Ngushticën e Hormuzit

UASHINGTON/ LONDËR, 24 korrik /ATSH-DPA/- Shtetet e Bashkuara të Amerikës dhe Britania e Madhe planifikojnë të zhvillojnë javën e ardhshme një takim të nivelit të lartë në Londër, për të diskutuar situatën e sigurisë në Ngushticën e Hormuzit, sipas burimeve të qeverisë amerikane.

Një zyrtar amerikan e konfirmoi sot planin, por nuk dha detaje mbi axhendën, datën apo pjesëmarrësit.

Më herët, portali “Axios” raportoi se në takim mund të diskutohet krijimi i një koalicioni ndërkombëtar, për mbrojtjen e anijeve tregtare që kalojnë nëpër Ngushticën e Hormuzit.

Sipas “Axios”, duke cituar diplomatë evropianë, në takim pritet të marrin pjesë ministrat e Mbrojtjes dhe komandantë të lartë ushtarakë nga vendet perëndimore dhe ato të rajonit.

Në raport thuhet se mes pjesëmarrësve mund të jenë edhe sekretari amerikan i Mbrojtjes, Pete Hegseth, si dhe shefi i Shtabit të Përbashkët të Forcave të Armatosura të SHBA-së, Dan Caine. /