FOKUS – Ukraina godet “Wildberries”, gjigantin e shitjeve online në Rusi

– Sulmet ukrainase me dronë ndaj magazinave të mëdha ruse të “Wildberries”, platforma më e madhe e shitjeve online në Rusi (e ngjashme me “Amazon”), kanë shkaktuar dëme të konsiderueshme, sipas AP.

Dronët ukrainas goditën fillimisht gjatë fundjavës, magazinat e kompanisë në “Elektrostal”, pranë Moskës, dhe në rajonin e Tambovit.

Ditën e djeshme u sulmuan edhe dy magazina të tjera në rajonet jugore Krasnodar dhe Stavropol, ku një person humbi jetën dhe 14 të tjerë u plagosën.

Kievi tha se këto sulme janë pjesë e operacionit ajror brenda territorit rus, me synim dobësimin e ekonomisë së luftës së Moskës dhe rritjen e kostos së pushtimit për qytetarët rusë.

Çfarë është “Wildberries”?

“Wildberries” u krijua në vitin 2004 nga Tatyana Kim, atëherë mësuese dhe nënë e re, fillimisht si një dyqan online për veshje.

Me kalimin e viteve u shndërrua në platformën më të madhe të tregtisë elektronike në Rusi, ku shesin mijëra biznese të mëdha dhe të vogla.

Kompania merret me ruajtjen, transportin dhe shpërndarjen e produkteve te klientët në të gjithë vendin.

Sipas “Forbes Russia”, pasuria e themelueses Kim u vlerësua në rreth 8,1 miliardë dollarë në prill.

Platforma shet një gamë të gjerë produktesh: veshje, libra, kozmetikë, lodra, pajisje shtëpiake, artikuj sportivë etj.

Në vitin 2021, Kim bleu një bankë të vogël dhe krijoi “Wildberries Bank”, e cila më pas u përfshi nga sanksionet e Britanisë së Madhe dhe Bashkimi Evropian.

Sulmet ndaj “Wildberries” shënojnë një përshkallëzim të strategjisë së Ukrainës, për të goditur objektiva ekonomike brenda Rusisë, duke synuar sektorë që prekin drejtpërdrejt jetën e përditshme të qytetarëve. /