FOKUS – Zelensky pret Vuçiçin në Ukrainë, diskutojnë integrimin evropian dhe luftën

– Presidenti i Ukrainës, Volodymyr Zelensky u takua sot me presidentin e Serbisë, Aleksandar Vuçiç, në kuadër të samitit të Nismës së Integrimit të Karpateve, që u zhvillua në Ukrainën perëndimore, sipas “Reuters”.

Sipas presidencës ukrainase, gjatë takimit, të dy liderët diskutuan marrëveshjet e arritura gjatë vizitës së Zelensky në Serbi në gusht, si dhe procesin e integrimit evropian të Ukrainës dhe Serbisë.

Një tjetër çështje e diskutuar ishte situata e krijuar nga sulmet ruse ndaj Ukrainës.

Të dy presidentët ranë dakord të vazhdojnë dialogun dypalësh.

Takimi u zhvillua në kuadër të samitit të parë të formatit “Tetëshja e Karpateve” (C8), një nismë e re që synon të forcojë bashkëpunimin mes vendeve të rajonit në fusha si siguria, energjia, transporti, logjistika dhe ekonomia.

Në samit morën pjesë përfaqësues të Austrisë, Polonisë, Rumanisë, Serbisë, Sllovakisë dhe Ukrainës, ndërsa formati synon të lidhë më ngushtë vendet e rajonit të Karpateve dhe fqinjët e tyre evropianë.

Duke folur për nismën, Zelensky deklaroi se bashkëpunimi rajonal duhet të ndihmojë në forcimin e sigurisë, energjisë, logjistikës dhe lidhjeve ekonomike ndërkufitare.

Presidenti ukrainas e lidhi gjithashtu këtë bashkëpunim me perspektivën evropiane të vendeve pjesëmarrëse, duke theksuar se Ukraina dhe Serbia synojnë anëtarësimin në Bashkimin Evropian.

Samiti zhvillohet në një kohë kur Ukraina vijon të përballet me sulme ruse dhe përpjekje për forcimin e bashkëpunimit të sigurisë me vendet evropiane. /