“Free Palestine”, Macklemore nis turneun e ri pas përplasjes me Ed Sheeran

Macklemore ka njoftuar se së bashku me disa artistë të ftuar do të udhëtojë jashtë SHBA-së për turneun “Free Palestine Tour”, pas polemikave të fundit me Ed Sheeran.

Reperi i hitit “Thrift Shop” njoftoi përmes Instagramit se turneu do të nisë në Dublin më 26 tetor, do të vijojë në Paris më 29 tetor dhe do të përfundojë në Londër më 30 tetor.

Datat e koncerteve në Shtetet e Bashkuara, si edhe emrat e artistëve që do t’i bashkohen turneut, do të bëhen publike së shpejti.

“Nëse këto javët e fundit na kanë treguar diçka, është se diçka ka ndryshuar gjatë tre viteve të fundit”, shkroi Macklemore, emri i vërtetë i të cilit është Benjamin Haggerty, në përshkrimin e postimit.

“Ka pasur një zgjim kolektiv rreth çlirimit të Palestinës, fuqisë së miliarderëve që përpiqen ta censurojnë këtë thirrje dhe asaj që presim nga artistët në ditët e sotme”, shtoi ai.

Reperi 43-vjeçar duket se iu referua edhe Ed Sheeran, i cili është përpjekur të mbajë një qëndrim neutral lidhur me luftën në Gaza.

Gjatë koncertit të 19 shtatorit, Sheeran tha se sulmet e 7 tetorit 2023, të udhëhequra nga Hamasi në Izrael, ishin “të tmerrshme” dhe se ato “shtuan shekuj dhimbjeje për hebrenjtë”. Ai gjithashtu deklaroi se veprimet e Forcave të Mbrojtjes së Izraelit në Gaza janë “katastrofike, të pajustifikueshme dhe disproporcionale”.

“Njerëzit po u kërkojnë artistëve të angazhohen, të informohen dhe të jenë pjesë e komunitetit. Ta përdorin skenën për diçka më shumë sesa argëtimi. Të reagojnë kur thirrja për një Palestinë të lirë përballet me përpjekje për ta heshtur atë”, vijoi ai.

Macklemore shtoi se ajo që i ka ndodhur atij është “më e madhe se një artist apo një skenë”.

“Kur klasa e miliarderëve mund të vendosë se cilat zëra lejohen të dëgjohen në skenë dhe cilët janë tepër të rrezikshëm për t’u dëgjuar, të gjithë duhet t’i kushtojnë vëmendje”, shkroi reperi.

Macklemore tha se, pasi “orari i tij u lirua pak”, ai ka nisur të kontaktojë me “artistë që janë angazhuar dhe kanë përdorur skenat e tyre për të treguar solidaritet me popullin palestinez, pavarësisht pasojave”.

“Për shkak të shpejtësisë me të cilën është bërë gjithçka, shumë prej bisedave, orareve dhe detajeve ende po finalizohen”, shpjegoi ai.

Në fund të postimit, Macklemore bëri të ditur se të gjitha të ardhurat nga turneu do t’u dhurohen organizatave që mbështesin popullin dhe lëvizjen palestineze.

Turneu vjen më shumë se një javë pasi Macklemore u hoq nga turneu “Loop Tour” i Ed Sheeran, pas deklaratave që bëri nga skena në lidhje me Palestinën dhe popullin e Gazës.

Macklemore pretendoi se këngëtari i “Perfect”, 35 vjeç, ishte vënë nën presion nga pronari i New England Patriots, Robert Kraft, për ta larguar reperin nga turneu për shkak të qëndrimit të tij politik.

Sipas raportimit, të gjithë artistët e tjerë që do të hapnin koncertet e Sheeran, mes tyre Finneas, Lukas Graham, Aaron Rowe dhe Beoga, u tërhoqën nga “Loop Tour” në shenjë solidariteti me Macklemore.

Ndërkohë, fansat kërkuan rimbursime nga Ticketmaster dhe Sheeran humbi afro 500 mijë ndjekës në Instagram që prej nisjes së polemikave.