Fundjava e kuqezinjve/ Laçi, Seferi dhe Hoxha shënojnë për klubet e tyre

Sezoni i ri ka nisur me sinjale pozitive për futbollistët shqiptarë që aktivizohen në kampionatet europiane. Në javët e para të sezonit të ri, disa prej legjionarëve kuqezi kanë lënë menjëherë gjurmën e tyre, duke u bërë protagonistë me gola dhe asiste, ndërsa të tjerë kanë nisur aventurat e reja si titullarë me skuadrat e tyre.

Në Turqi, Qazim Laçi ishte heroi i Rizespor në javën e parë të kampionatit. Mesfushori i Kombëtares shqiptare e nisi ndeshjen si titullar ndaj Konyaspor dhe realizoi golin e fitores 1-0 në minutën e 97-të. Laçi ekzekutoi saktë penalltinë e akorduar në shtesë, duke i dhuruar skuadrës së tij tri pikët në startin e sezonit.

Edhe Taulant Seferi e ka nisur në mënyrën më të mirë eksperiencën e tij me Kayserispor. Pas dy golave në javën e parë, sulmuesi shqiptar gjeti sërish rrugën e rrjetës në përballjen ndaj Sivasspor, duke shënuar golin e dytë të skuadrës së tij pas një aksioni të shpejtë në fundin e pjesës së parë.

Në Kroaci, Arbër Hoxha realizoi golin e tij të parë për sezonin e ri me Dinamo Zagrebin. Sulmuesi kuqezi shënoi në fitoren 4-0 ndaj Rudesit, duke vulosur një paraqitje të mirë të kampionëve kroatë.

Një nisje pozitive ka pasur edhe Mario Mitaj, i cili në ndeshjen e tij të parë zyrtare me fanellën e Genoas regjistroi menjëherë një asist. Mbrojtësi i Kombëtares kontribuoi në suksesin 4-1 ndaj Ascolit në Kupën e Italisë, duke asistuar për golin e Marcandallit.

Në Poloni, Juljan Shehu regjistroi asistin e parë të sezonit me Widzew Łódź. Mesfushori shqiptar ishte protagonist në aksionin që solli golin e avantazhit ndaj Korona Kielce.

Një tjetër legjionar që ka nisur të lërë shenjë në ekipin e tij të ri është Mirlind Daku. Sulmuesi shqiptar u aktivizua si titullar për herë të parë me Spartak Moscoë dhe dha menjëherë kontribut në fitoren ndaj Baltikës 2-1, duke asistuar për Ugalden që në minutën e 20-të.

Përveç protagonistëve me gola dhe asiste, në fushë janë shfaqur si titullarë edhe Simon Simoni, Klisman Cake, Stavro Pilo, Adrion Pajaziti, Nedim Bajrami dhe Rey Manaj, duke nisur kështu angazhimet e tyre në kampionatet respektive.