Gajiç: Narodna stranka del në zgjedhje në koalicion me “Mi – snaga naroda” të Nestoroviçit dhe dy parti të vogla

“Narodna stranka do të dalë në zgjedhje në koalicion me partinë ‘Mi – snaga naroda’ të Branimir Nestoroviçit, ashtu siç e paralajmëruam para shtatë ditësh. Pjesë e koalicionit do të jenë edhe dy parti të vogla, njëra prej tyre e pakicës”, ka thënë për gazetën serbe Danas lideri i Narodna strankës, Vladimir Gajiç.

Gajiç ka shtuar se koalicioni nuk është vonë për fushatën zgjedhore: “Kemi mjaftueshëm kohë. Nuk ngutemi, po organizohemi”. Gazeta Danas nuk arriti të konfirmojë nëse Lëvizja e Socialistëve të Aleksandar Vulinit është një nga partitë e vogla pjesë e koalicionit.

Dy ditët e fundit partia e Nestoroviçit u përball me një përçarje serioze pikërisht për shkak të koalicioneve të mundshme. Së pari, një pjesë e Kryesisë së “Mi – snaga naroda” akuzoi liderin e partisë se po bënte koalicion me Vulinin pas shpine të tyre, me sponsorizimin e BIA-s, dhe se nuk u përgjigjej në telefon.

Më pas Nestoroviç organizoi një kuvend të jashtëzakonshëm të partisë, ku, sipas Slobodan Iliçit, u përjashtuan anëtarët rebelë të Kryesisë. Për përjashtimin e tyre, sipas tij, votuan banorë të sjellë nga “Çacilendi”. Zgjedhjet parlamentare në Serbi mbahen më 25 tetor.

Burimi: Danas