Gjyqi i Veliajt në GJKKO, kryebashkiaku nuk merr pjesë në seancë, zbulohet deklarata e tij

Ka nisur sot në 7 korrik në GJKOO seanca gjyqësore në ngarkim të kryetarit të Bashkisë së Tiranës, Erion Veliaj.

Siç raporton gazetarja Glidona Daci, Veliaj nuk është i pranishëm në seancë. Kjo, pasi ka refuzuar të qëndrojë në kafazin e xhamtë. I pranishëm në sallë është Valmir Xoxa, një nga të dyshuarit në këtë proces.

Mësohet se Veliaj ka dërguar një deklaratë përpara gjykatës. Ai ka thënë se dëshiron që të përfaqësohet në proces nga avokati i tij, Plarent Ndreca. “Kam marrë dijeni për seancën gjyqësore. Dëshiroj të përfaqësohem nga avokati Plarent Ndreca”, ka thënë kryetari i Bashkisë së Tiranës.

Edhe bashkëshortja e Veliajt, Ajola Xoxa nuk është e pranishme në GJKKO. Edhe ajo përfaqësohet nga avokati.

Më herët, gjykata i ka refuzuar Veliajt këkesën për transmetim live të seancës gjyqësore. Po ashtu, është rrëzuar edhe kërkesa për të mos qenë në kafazin e xhamtë.

Prokurori i çështjes Ols Dado ka argumentuar se qëndrimi në kafaz nuk përbën trajtim poshtërues. Sipas tij, qëndrimi në të është një masë e domosdoshme për të garantuar një proces të sigurt.

Kujtojmë se Prokuroria ka ngritur 13 akuza ndaj Erion Veliajt.