Gratë në industrinë e filmit veshën krijimet e Chanel në drekën vjetore “Through Her Lens”

Dreka vjetore “Through Her Lens” e Chanel, në edicionin e saj të 11-të, shënoi hapjen e sezonit të vjeshtës me një homazh për aktivisten feministe Gloria Steinem. Jane Rosenthal, producentja dhe bashkëthemeluesja e Tribeca Enterprises, vlerësoi ndikimin e Steinemit dhe nxitjen për të vijuar me guxim dhe angazhim në mbrojtje të të drejtave të grave.

Sipas Harper’s Bazaar, ngjarja e organizuar nga Tribeca Chanel Women’s Filmmaker Program u mbajt në restorantin Locanda Verde në Manhatan dhe tërhoqi figura të njohura të Hollivudit, përfshirë Halle Berry, Regina King, H.E.R., Riley Keough, Misty Copeland, Rosanna Arquette, Emmy Rossum, Michelle Monaghan, Rosie Perez, Chloe Fineman, Autumn Durald Arkapaw dhe Patty Jenkins. Në një moment surprizë, Robert De Niro u ngjit për të kënduar “Gëzuar ditëlindjen” për Rosenthal në 70-vjetorin e saj.

Dreka shënoi gjithashtu nisjen e një pune tre-ditore, ku një grup kreativësh i përzgjedhur merr pjesë në sesione me mentorë mbi zhvillimin e skenarit, regjinë, kompozimin muzikor dhe kostumografinë. Ekipi fitues do të marrë financimin e plotë për realizimin e një filmi të shkurtër, ndërsa katër ekipe të tjera do të përfitojnë grante për zhvillim. Rosenthal përmendi se gjatë 11 vjetëve të fundit kanë mbështetur mbi 100 kineastë dhe rreth 50 filma, duke theksuar se problemi nuk është talenti, por mungesa e aksesit.

Ngjarja nënvizoi angazhimin e Chanel dhe Tribeca për të fuqizuar gratë në kinematografi dhe për t’u krijuar mundësi reale autoreve të reja. Siç raporton Harper’s Bazaar, iniciativa “Through Her Lens” vazhdon të ofrojë mbështetje praktike dhe financiare për projekte të grave në film.