HAPËSIRË – Dielli ‘fshihet” për pak minuta, Europa përgatitet për spektaklin kozmik

– Ditën sotme, Hëna do të mbulojë për pak kohë të gjithë diskun e Diellit përgjatë një brezi të ngushtë në Evropën Perëndimore, shkruan focus.it.

Kjo do të jetë eklipsi i parë total diellor i dukshëm në Evropë që nga viti 1999, dhe do të përkojë me kulmin e dukshmërisë së shiut meteorik Perseidët.

Pra, do të jetë një mbrëmje dhe një natë ideale për t’i kaluar duke parë qiellin. Por jo të gjithë do të kenë të njëjtën mundësi.

Eklipsi total diellor: ku do të shihet plotësisht?

Eklipsi total diellor ndodh kur diametri këndor i dukshëm i Hënës – pra madhësia me të cilën Hëna duket në qiell – është pothuajse i njëjtë me atë të Diellit dhe disku i Hënës e mbulon plotësisht diskun diellor.

Që kjo të ndodhë, Hëna duhet të jetë pranë perigjeut, pikës më të afërt të orbitës së saj me Tokën.

Më 12 gusht, Hëna do të jetë vetëm rreth 3.000 km larg perigjeut, ku kishte kaluar dy ditë më parë, në një distancë prej afërsisht 367.000 km nga Toka.

Vendet më të mira për të parë eklipsin do të jenë Islanda perëndimore dhe Spanja veriore.

Në Spanjë, rruga e eklipsit do të përshkojë një pjesë më të madhe të territorit, nga Galicia në veriperëndim deri te Ishujt Balearikë në juglindje.

Eklipsi do të prekë edhe qytete të rëndësishme si Bilbao, Burgos, Palma, Valencia dhe Zaragoza, duke ofruar më shumë mundësi për të gjetur një pikë të përshtatshme për vëzhgim.

Brezi i totalitetit, pra zona e ngushtë e Tokës ku Hëna do të bllokojë plotësisht Diellin, do të përfshijë gjithashtu një pjesë të vogël të Portugalisë, pranë kufirit verilindor me Spanjën, si dhe disa zona të Rusisë dhe Grenlandës, megjithëse këto janë shumë më pak të banuara.

Ku do të shihet vetëm pjesërisht?

Në disa zona veriore të Shteteve të Bashkuara dhe në Kanadanë lindore do të mund të shihet një eklips diellor i pjesshëm.

E njëjta gjë do të ndodhë në disa zona të Mbretërisë së Bashkuar, Francës, Belgjikës dhe Zvicrës.

Edhe në Itali eklipsi do të jetë vetëm i pjesshëm, në perëndim të diellit, kur Dielli do të jetë shumë pranë horizontit perëndimor.

Megjithatë, nuk do të errësohet plotësisht qielli dhe nuk do të shihet korona diellore, sepse eklipsi do të ndodhë rreth orës 19:30, kur Dielli është tashmë shumë pranë perëndimit.

Ekspertët këshillojnë që, disa ditë përpara, të bëhet një provë për të parë Diellin në momentin e perëndimit, pasi një kodër, mal apo reliev në drejtimin perëndim-veriperëndim, nga ku perëndon Dielli, mund ta fshehë atë plotësisht.