Iraku mori përgjegjësinë e plotë për sigurinë pas daljes së koalicionit ndërkombëtar, falënderon SHBA-në

Ministria e Jashtme e Irakut ka deklaruar se vendi ka hyrë në një fazë të re në të cilën merr përgjegjësinë e plotë për sigurinë dhe stabilitetin e vet, pas mbylljes zyrtare të misionit të koalicionit ndërkombëtar të udhëhequr nga Shtetet e Bashkuara, raporton Al Jazeera.

Në deklaratën e saj, ministria shprehu “falënderimin dhe vlerësimin e thellë” për Shtetet e Bashkuara të Amerikës si udhëheqëse të koalicionit ndërkombëtar, si dhe për vendet mike pjesëmarrëse, për mbështetjen e dhënë në fushatën kundër grupit ISIS, që nisi më shumë se një dekadë më parë. Sipas Bagdadit zyrtar, përfundimi i misionit nuk nënkupton fundin e bashkëpunimit me vendet mike.

“Përpjekjet ndërkombëtare për të luftuar ekstremizmin do të mbeten një ecuri e vazhdueshme, e bazuar në interesa të përbashkëta dhe respekt reciprok për sovranitetin kombëtar”, thuhet në deklaratë, ku përmenden trajnimet, shkëmbimi i ekspertizës dhe informacionit, si dhe ngritja e kapaciteteve si forma të bashkëpunimit të ardhshëm. Ministria ritheksoi angazhimin për forcimin e marrëdhënieve me partnerët ndërkombëtarë mbi bazën e respektit reciprok dhe interesave të përbashkëta.

Deklarata vjen pasi misioni i koalicionit ndërkombëtar në Irak u mbyll zyrtarisht, duke i dhënë fund më shumë se dy dekadave të pranisë ushtarake të huaj në vend. Dalja e koalicionit është një nga pasojat kryesore rajonale të luftës së zgjatur SHBA–Iran, e cila e ka riformësuar hartën e sigurisë në Lindjen e Mesme.