Irfan Azizi, shqiptari në Britani: ‘Duan të më vrasin!’ Flet për atentate ndaj gjyqtarëve dhe prokurorëve

Një kriminel shqiptar nuk duhet të dërgohet mbrapsht për t’u përballur me drejtësinë, sepse atentatorët që më parë janë përpjekur ta vrasin do të

Një kriminel shqiptar nuk duhet të dërgohet mbrapsht për t’u përballur me drejtësinë, sepse atentatorët që më parë janë përpjekur ta vrasin do të rikthehen për “ta përfunduar punën”, u tha në gjykatë, shkruan Daily Mail.

Irfan Azizi tha gjatë një seance për ekstradim se mezi kishte shpëtuar me jetën kur ndaj tij u qëllua “30 herë” gjatë një atentati në vitin 2020, gjë që e shtyu të arratisej drejt Britanisë.

36-vjeçari tha se grupi kriminal që u përpoq ta vriste “kryen gjithashtu atentate për gjyqtarë dhe politikanë” dhe do të kërkonte hakmarrje nëse ai kthehet në Shqipëri.

Personi me precedentë të shumtë penalë po kërkon tani azil në Mbretërinë e Bashkuar së bashku me bashkëshorten e tij, ndërsa më herët çifti është strehuar në një hotel të financuar nga taksapaguesit.

Dje, Gjykata e Magjistratëve në Westminster dëgjoi se Azizi kërkohet në Shqipëri për të vuajtur një dënim me një vit burg, pasi është dënuar në mungesë për posedim të një telefoni celular gjatë kohës që ndodhej në paraburgim për vepra të tjera penale.

Gjatë një shkëmbimi të pazakontë, Azizi pranoi se i kishte paguar tashmë gjyqtarit shqiptar për ta mbyllur çështjen dhe tha se kjo do të nënkuptonte se ai nuk ishte më person në kërkim.

Të dhënat e gjykatave britanike tregojnë se Azizi dhe një tjetër shtetas shqiptar u dënuan secili me nga gjashtë muaj burg në Gjykatën në Swindon në prill 2025 për posedim patentash të falsifikuara gjermane.

Azizi ka gjithashtu një histori të gjatë kriminale në Shqipëri, përfshirë përfshirje në rrjete të paligjshme të lojërave të fatit.

Në shkurt 2019, ai u dënua me dy vite burg për vjedhje, përpara se të merrte një tjetër dënim me dy vite e tre muaj në qershor për vjedhjen e një makine tip Mercedes-Benz B-Class.

Por vetëm pesë muaj më vonë, ai ishte sërish i lirë dhe në rrugë.

Tentativa për vrasjen e tij ndodhi më 29 nëntor 2020. Ai tregoi se pa një automjet që u ndal jashtë një pike karburanti, përpara se një person i armatosur të zbriste duke mbajtur një kallashnikov.

“Ata filluan të qëllonin drejt meje, rreth 30 plumba”, i tha ai Gjykatës së Magjistratëve në Westminster. “Një plumb më goditi dorën, e cila u thye në 13 vende”.

Organizatori i atentatit është raportuar gjerësisht në mediat shqiptare si Talo Çela, një ish-mik i afërt i Azizit, i cili aktualisht është një nga personat më të kërkuar në Shqipëri.

Çela dyshohet se ka lidhje me bandën kriminale Çopja, një furnizues i madh i kokainës në Londër, shkruajnë mediat britanike.

Azizi, djali i një fermeri, tha se u largua nga Shqipëria me autobus pesë javë pas atentatit, duke mbërritur në Britani disa ditë më vonë.

Ai qëndroi fillimisht te miq dhe një kushëri, përpara se në shtator 2021 të zhvendosej në Sheffield, ku iu bashkua edhe bashkëshortja.

Azizi pretendoi se kishte qenë një “biznesmen i pasur” në Shqipëri, me tre pika karburanti, si dhe lavazhe dhe një kafene-bar.

Por pasi bashkëshortja iu bashkua në Mbretërinë e Bashkuar, çifti kërkoi azil me argumentin se kishin frikë nga përndjekja në vendin e tyre dhe u strehuan në një hotel azili të financuar nga taksapaguesit në Wiltshire, shkruajnë tabloidet britanike.