Japonia thyen rekordin, numri i personave mbi 100 vjeç kalon 100 mijë

– Japonia ka regjistruar një rekord historik të jetëgjatësisë, pasi numri i personave të moshës 100 vjeç e lart, ka kaluar për herë të parë shifrën 100 mijë, sipas “Die Welt”.

Sipas të dhënave të publikuara sot nga Ministria japoneze e Shëndetësisë, Punës dhe Mirëqenies, në Japoni jetojnë 107 677 persona 100 vjeç e lart, bazuar në të dhënat e regjistruara deri më 1 shtator 2026.

Shifra është rritur me 7 914 persona krahasuar me një vit më parë.

Ky është viti i 56-të radhazi që Japonia shënon rritje të numrit të personave mbi 100 vjeç.

Në vitin 1963, kur nisi regjistrimi i këtyre statistikave, në vend numëroheshin vetëm 153 persona të kësaj grupmoshe.

Gratë përbëjnë pjesën dërrmuese të 100-vjeçarëve.

Ato përfaqësojnë rreth 88% të totalit, ndërsa numri i personave 100 vjeç e lart për çdo 100 mijë banorë ka arritur në 87,51.

Nga prefekturat, Shimane ka raportin më të lartë, me 186 65 persona 100 vjeç e lart për 100 mijë banorë.

Ajo pasohet nga Kochi me 169 52 dhe Tottori me 152 48.

Shimane mban vendin e parë për të 14-in vit radhazi.

Rekordi i ri vjen në një kohë kur Japonia po përballet njëkohësisht me një tjetër realitet demografik: popullsia e përgjithshme po tkurret dhe shoqëria po plaket me shpejtësi.

Kjo krijon sfida për tregun e punës, sistemin e pensioneve, kujdesin shëndetësor dhe financat publike.

Të dhënat e fundit tregojnë se Japonia ka një nga strukturat më të vjetra të popullsisë në botë.

Rritja e numrit të 100-vjeçarëve e bën Japoninë, një nga shembujt më të spikatur globalë të rritjes së jetëgjatësisë, por njëkohësisht nënvizon përmasat e ndryshimit demografik me të cilin përballet vendi. /