“Kemi sekuestruar kamerat”, çfarë thotë policia për dhunën ndaj ish-kreu të PD-së në Lezhë – Tv Klan

Ka një reagim zyrtar nga ana e policisë këtë të hënë, 11 maj, për rastin e dhunës ndaj ish-kreut të PD-së në Dajç të Lezhës, Sokol Toma.

Sipas bluve, ngjarja ka ndodhur rreth orës 22:00 të dy ditëve më parë, në autostradën Mamurras-Laç, në afërsi të kryqëzimit të Sanxhakut. Siç u raportua më herët, shtetas ende të paidentifikuar e kanë goditur me sende të forta duke i shkaktuar dëmtime të rënda në trup.

“Grupi hetimor, në drejtimin e Prokurorisë, po vijon veprimet intensive, ka sekuestruar pamjet filmike të kamerave në një territor të gjerë, dhe po kryen një sërë veprimesh të tjera hetimore me qëllim zbardhjen e rrethanave, identifikimin dhe kapjen e autorëve”, sqarohet në njoftim.

Toma është gjetur në gjendje të rënduar brenda automjetit nga kalimtarë të rastit, të cilët kanë njoftuar menjëherë shërbimet e urgjencës. Më pas është transportuar me shpejtësi drejt Spitalit të Traumës në Tiranë, ku raportohet se ndodhet jashtë rrezikut për jetën.