KOLUMBI – De la Espriella premton të mposhtë narko-terroristët

BOGOTA, 8 gusht /ATSH-AFP/ -Presidenti i ri i Kolumbisë, Abelardo de la Espriella, është zotuar të rikthejë rendin dhe të çrrënjosë grupet e armatosura të lidhura me trafikun e drogës, në fjalimin e tij të parë pas marrjes së detyrës.

De la Espriella, një politikan i krahut të djathtë që fitoi zgjedhjet me një diferencë shumë të ngushtë, bëri  dje betimin presidencial  në qytetin Cali, duke shënuar një kthesë të fortë politike pas katër viteve të qeverisjes së majtë të Gustavo Petros.

Duke iu drejtuar qindra ushtarëve në një bazë ushtarake në Cali, presidenti i ri tha se qeveria e tij do të luftojë pa kompromis kundër grupeve kriminale dhe guerile.

Ai deklaroi se mundësia për dialog me këto organizata është shteruar, duke kritikuar qasjen e paraardhësit Petro, i cili kishte tentuar negociata paqeje me disa prej grupeve të armatosura.

De la Espriella synon gjithashtu të forcojë ndjeshëm bashkëpunimin me Shtetet e Bashkuara në luftën kundër karteleve të drogës.

Një nga prioritetet e tij është anëtarësimi në aleancën rajonale amerikane “Shield of the Americas”, ndërsa administrata Trump ka sinjalizuar se synon të punojë me Kongresin për një paketë prej 1 miliard dollarësh ndihmë për sigurinë e qeverisë së re.

Presidenti kolumbian, i cili ka shtetësi të dyfishtë amerikane dhe kolumbiane, ka propozuar masa të ashpra kundër trafikut të drogës, përfshirë ndërtimin e “mega-burgjeve”, goditjen e laboratorëve të kokainës dhe eliminimin e kulturave të kokës që përdoren për prodhimin e saj. /Ad.Ab./ a.jor.