Kosovë: Pas 13 vitesh aktivitet, deputetja Donika Kadaj-Bujupi jep dorëheqje nga AAK

Pas 13 vitesh të aktivitet në AAK, anëtarja e Kryesisë së Aleancës për Ardhmërinë e Kosovës, Donika Kadaj Bujupi, njëherësh shefe e Grupit Parlamentar, ka dhënë dorëheqje nga kjo parti politike. Vendimin për dorëheqje e ka kumtuar vet, deputetja Donika Kadaj-Bujupi.

Në një deklaratë me shkrim, Donika Kadaj Bujupi ka sqaruar arsyet e dorëheqjes së papritur.

“Si qytetare dhe deputete e Kuvendit të Republikës së Kosovës, kam dhënë kontributin tim të jashtëzakonshëm me qëllim të ndaljes së dy marrëveshjeve të dëmshme për vendin dhe për kauzën në të mirën e vendit. Mirëpo luhatja aktuale e sidomos marrja e vendimeve të njëanshme, të cilat vazhdimisht po e pengojnë krijimin e një alternative të fuqishme, e cila do të inicionte ndryshimin, është një prej arsyeve që ka zbehur dhe dobësuar ëndrrën për ndryshim në këtë vend, vend i cili nuk e meriton gjendjen në të cilën është, ëndërr për të cilën përherë kam sakrifikuar dhe kam qenë e gatshme të ballafaqohem edhe me burg edhe me çfarëdo sfide tjetër. Situata e krijuar po më imponon që sot me keqardhje t’ju njoftoj se më nuk do të jam pjesë e AAK-së, pjesë e partisë për të cilën kam punuar ditë e natë që 13 vite më parë kur fillova aktivitetin tim. I falënderoj të gjithë mbështetësit e mi dhe ju premtoj se çdoherë do te gjej mënyrën për t’ju shërbyer drejt juve dhe interesave të vendit. Vendimi im hyn në fuqi menjëherë dhe është i pa kthyeshëm”, ka deklaruar Donika Kadaj-Bujupi.

Ndërkaq në sqarimin e Aleancës për Ardhmërinë e Kosovës thuhet se vendimi i Donika Kadaj-Bujupi, që të mos jetë më pjesë e AAK-së, është vendim që i përket vetëm asaj dhe arsyeve të saj. “Aleanca për Ardhmërinë e Kosovës, shpreh keqardhje për këtë vendim të Zonjës Kadaj-Bujupi, dhe asaj i shpreh mirënjohje për kontributin e deritashëm në AAK dhe në Kuvendin e Kosovës, si deputete e AAK-së, duke i dëshiruar suksese në rrugëtimin dhe në zgjedhjen e saj”, thuhet në qëndrimin e AAK-së.