Kriza e refugjatëve, kancelari austriak: Mbrojtje kufijve të BE

Situata në vendet e Afrikës që solli edhe valët e mëdha të refugjatëve përmes Europës, duke ndjekur rrugën Ballkanike është diçka që nuk mund të zgjidhet në kohë afatshkurtër.

Në këto kushte ajo që duhet të bëjmë është të shohim se çfarë po funksionon dhe masat që duhet të marrim në vijim. Ka qenë kjo deklarata e kancelarit Austriak Christian Kern pas takimit të mbajtur me liderat europian, ata të qeverive në vendet e Ballkanit, si dhe komsionerin Europian për Emigrimin.

“Ne dimë që zhvillimet në vendet e origjinës së refugjatëve nuk do zgjidhen menjëherë dhe kjo është diçka që do të zgjasë. Turqia po vazhdon me masat e saj por ne nuk duhet të varemi nga kjo dhe duhet të gjejmë zgjidhje. Së pari ka të bëjë me parashikimin e burimeve të nevojshme që duhet të vihen në dispozicion për të rritur kapacitetet në mbrojtjen e kufijve. Së dyti të sigurojmë marrëveshjen me Turqinë pasi kjo e fundit ka tregues vendosmëri, por në nuk kemi treguar të njëjtin qëndrim. Ka nevojë që të bëhen marrëveshje individuale me vende të caktuara njëlloj siç ka ndodhur me Turqinë. I mëshoj faktit që ne duhet të mbrojmë kufijtë dhe kur them kufijtë flas për ata të Bashkimit Europian, sepse nëse dështojmë në këtë rast mbrojtja e çdo vendi do të kthehet individuale dhe askush nga ne nuk e parashikon dot humbjen e madhe në ekonomi, turizëm, shëndetësi që do të kemi”, tha kancelari.

Samiti emërtohej “Migrimi përmes trajektores Ballkanike” dhe si i tillë kishte pjesë të tij në diskutime edhe kryeminsitra të Ballkanit mes të cilëve edhe kryeministri i Shqipërisë Edi Rama.