Kryeministria reagon ndaj akuzave të portalit ‘syri.net’ dhe ish-kryeministrit Sali Berisha

Kryeministria ka reaguar sot nëpërmjet portalit “transparenca.al”, ndaj akuzave të portalit ‘syri.net’ dhe ish-kryministrit Sali Berisha për helikopterin e Forcave të Armatosura.

Portali ‘syri.net’ ka publikuar një artikull të shoqëruar me foto e video, në të cilin pretendohet se përpara se të rrëzohej, helikopteri i Forcave të Armatosura është ulur në doganën e Hanit të Hotit. Gjithashtu, i njëjti pretendim ngrihet edhe në reagimin në Facebook të ish-kryeministrit Sali Berisha.

Në ‘transparenca.al’ theksohet se ‘lidhur me pretendimet e artikullit të portalit ‘syri.net’ dhe ish-kryeministrit Sali Berisha, sqarojmë se helikopteri EC 145 me numër anësor 637, në orën në të cilën portali pretendon se është ulur në doganën e Hanit të Hotit, ka qenë në një fluturim të planifikuar në jug të Shqipërisë, fluturim të nisur në orën 09:10 të mëngjesit të ditës së djeshme me itinerarin, Farkë-Belsh- Gllavë- Tepelenë- Skerficë -Butrint- Ksamil- Sarandë- Llogara- Akerni- Lushnje, e në fund është ulur pa problem në bazën e Farkës”.

Ndërkaq, nënvizohet në ‘transparenca.al’,  “siç është thënë më herët, helikopteri është nisur nga Farka në orën 12:10 dhe po kryente fluturim rutinë stërvitor rikonjicioni, sipas planit të fluturimit të bazës ajrore Farkë, në intenerarin Farkë-Tujan-Qafë Murr-Qafë buall-Shupenzë-Peshkopi-Kukës-Qafë Luzhë-Qafë Valbonë-Vermosh-Rapstarje-Koplik-Shkodër-Farkë”.

“Helikopteri i shfaqur në videon e portalit ‘syri.net’ është civil, me përmasa më të mëdha dhe pa shenja dalluese të Forcës së Armatosur. Në këtë video gjithashtu dallohet qartësisht se helikopteri është i pajisur me rrota. Ndërkohë që asnjë helikopter i FA-ve nuk është i pajisur me rrota, por janë të pajisur me sistemin me slitë”, thuhet në ‘transparenca.al’.

“Sa më sipër, aludimet e portalit ‘syri.net’ janë të pavërteta dhe për më tepër dashakeqe. Ftojmë median të distancohet nga abuzimet që nuk ndalen as përpara humbjes së jetës së dy pilotëve të Forcave të Armatosura në krye të detyrës”, përfundon portali ‘transparenca.al’.