Kryeprokurorja Arta Marku bën lëvizjen e radhës, zgjedh këshilltar prokurorin e njohur Besnik Cani
Prokurorja e përgjithshme e përkohshme Arta Marku ka bërë sot ndryshimin e radhës në institucionin që drejton.
Mësohet se Marku ka emëruar prokurorin Besnik Cani si këshilltar në kabinetin e saj.
Besnik Cani ka qenë më herët drejtues i Prokurorisë së Shkodrës, ndërsa aktualisht është prokuror në Prokurorinë e Tiranës.
Që nga marrja e detyrës si Prokurore e Përgjithshme, Arta Marku ka kryer disa lëvizje.
Lëvizja e parë që ka bërë ishte heqja e prokurores së dekriminalizimit.
Në datën 29 dhjetor, ajo shkarkoi nga detyra Rovena Gashin, drejtore e njësisë së dekriminalizimit në zyrën e marrëdhënieve me Jashtë në Prokurorinë e Përgjithshme.
Pak pas ardhjes në detyrë, Prokurorja e Përgjithshme, znj. Arta Marku, ka komanduar në pozicionin e Drejtorit të Kabinetit, znj. Alketa Zifla, e cila ushtronte funksionet e prokurorit pranë Prokurorisë së Rrethit Gjyqësor, Tiranë.
Prokurorja e Përgjithshme, znj. Arta Marku ka firmosur vendimin për caktimin e prokurorit Dritan Rreshka në pozicionin e përkohshëm të Drejtuesit të Prokurorisë së Rrethit Gjyqësor Tiranë.
Ndërkohë, drejtuesi i deritanishëm i Prokurorisë së Tiranës, Petrit Fusha, do të vijojë komandimin si prokuror sektori, i ngarkuar për çështje të veçanta, pranë Prokurorisë së kryeqytetit.