Kuvendi mbyll punimet të enjten, PD kërkon seancë plenare për mocion me debat mbi protestat

Grupi Parlamentar i Partisë Demokratike i ka kërkuar Kuvendit zhvillimin me urgjencë të një mocioni me debat në seancë plenare, duke argumentuar se protestat e vazhdueshme qytetare dhe çështjet që lidhen me transparencën e qeverisë kërkojnë një diskutim të menjëhershëm në Parlament.

Kërkesa, e firmosur nga kryetari i Grupit Parlamentar të PD-së, Gazment Bardhi, vjen në prag të mbylljes së punimeve të Kuvendit për këtë sesion parlamentar, e parashikuar të zhvillohet të enjten.

Demokratët argumentojnë se kërkesat e ngritura nga protestuesit në tubimet e fundit qytetare përbëjnë çështje me interes të lartë publik dhe duhet të marrin përgjigje institucionale përmes debatit parlamentar.

Sipas dokumentit të depozituar në Kuvend, protestuesit kanë artikuluar pesë kërkesa kryesore: dorëheqjen e qeverisë, shfuqizimin e kuadrit ligjor për investimet strategjike, anulimin e kuadrit ligjor të njohur si “Paketa e Maleve”, shfuqizimin e ndryshimeve në ligjin për zonat e mbrojtura dhe anulimin e ndryshimeve në ligjin për trashëgiminë kulturore shqiptare.

PD thekson se këto janë çështje që opozita i ka ngritur prej kohësh në Kuvend dhe për të cilat ka depozituar edhe nisma ligjore konkrete për shfuqizimin e akteve përkatëse.

Në kërkesën drejtuar Konferencës së Kryetarëve dhe drejtuesve të Kuvendit, demokratët nënvizojnë se debati parlamentar është i domosdoshëm për të garantuar transparencë dhe llogaridhënie përballë shqetësimeve të ngritura nga qytetarët.

Po ashtu, Partia Demokratike rikujton se më herët ka kërkuar zhvillimin e një mocioni me debat edhe mbi raportin e fundit të Parlamentit Europian dhe progresin e Shqipërisë në procesin e integrimit europian, duke vlerësuar se gjetjet dhe rekomandimet e raportit meritojnë një diskutim të posaçëm në Kuvend.