La Fuente: Asnjë lojtar i Real Madridit me Spanjën në Botëror? Kjo gjë nuk më surprizon…

Luis de la Fuente foli në “El Larguero” për kombëtaren spanjolle në prag të Botërorit 2026. Ai u pyet për mungesën e lojtarëve të Real Madridit në listë.

“A më surprizon? Jo, nuk më surprizon, sepse e njoh potencialin e futbollit spanjoll dhe e di që nuk janë vetëm lojtarët më të mirë të Barcelonës, Real Madridit apo Atlético Madridit. Ka mjaft lojtarë shumë të mirë në klube të tjera. Dhe, duke pasur këtë njohje të detajuar të futbollit spanjoll, zgjedhim lojtarët që mendojmë se përshtaten më mirë në atë moment për të zhvilluar idenë tonë”, – tha ai.

Gazetari e pyeti: “Po, por është hera e parë në histori që nuk ka asnjë lojtar të Real Madridit në një Botëror…” Trajneri u përgjigj: “Nuk i jap vlerë kësaj rrethane. Ajo që dua është të kemi sa më shumë lojtarë spanjollë, që janë në nivelin e kërkuar për të konkurruar në një Botëror. Mund të jenë te Real Madridi ose kudo tjetër, kjo nuk ka rëndësi për mua, pasi kemi konsideruar se këta 26 janë më të mirët”.