La vajzën 11-vjeçare vetëm për dy ditë për të ndjekur ndeshjen në Elbasan, babai nën hetim në Qipro

Një 11-vjeçare dyshohet se është lënë vetëm në shtëpi për dy ditë nga babai i saj, i cili kishte udhëtuar në Shqipëri për të ndjekur një ndeshje futbolli në Elbasan. Policia në Qipro ka nisur hetimet ndaj tij për neglizhencë dhe abuzim ndaj fëmijës.

Policia në Qipro po heton një rast të dyshuar të neglizhencës ndaj një fëmije, pasi një vajzë 11-vjeçare u gjet e vetme në banesën e familjes, pa praninë e një të rrituri.

Ngjarja u konstatua mbrëmjen e së enjtes, kur policia u njoftua për situatën dhe efektivët shkuan në banesën ku ndodhej vajza.

Gjatë komunikimit me efektivët, 11-vjeçarja dyshohet se ka deklaruar se babai i saj kishte udhëtuar jashtë vendit për të ndjekur një ndeshje futbolli dhe kishte munguar prej dy ditësh.

Sipas të dhënave që po verifikohen nga autoritetet qipriote, babai kishte udhëtuar drejt Shqipërisë për të ndjekur ndeshjen e Paphos FC kundër Dynamo City, e zhvilluar në Elbasan në kuadër të eliminatoreve të Ligës së Konferencës së UEFA-s.

Për këtë ndeshje, klubi qipriot kishte organizuar edhe një udhëtim për tifozët, me nisje nga Paphos më 19 gusht.

Pas konstatimit të rastit, shërbimet e Mirëqenies Sociale u vunë në dijeni dhe morën përsipër mbrojtjen dhe kujdesin për vajzën.

Ndërkohë, policia ka nisur procedurat hetimore ndaj babait, i cili dyshohet për neglizhencë dhe abuzim ndaj fëmijës.

Hetimet vijojnë për të sqaruar rrethanat e plota të ngjarjes. Deri më tani nuk është bërë e ditur nëse babai është kthyer në Qipro dhe nëse ndaj tij është lëshuar apo jo një urdhër-arresti.