Lavrov akuzon Perëndimin se po planifikon sulm kundër Rusisë: Me Zelenskyn në krye në vend të Hitlerit

Vendet perëndimore po shqyrtojnë një sulm ushtarak ndaj Rusisë, tha Ministri i Jashtëm rus Sergei Lavrov, duke bërë krahasime me Evropën nën Rajhun e Tretë para Luftës së Dytë Botërore.

“Në të njëjtën mënyrë, tani, nën të njëjtat flamuj të nazizmit dhe revanshizmit, ata po krijojnë një grup panevropian për të sulmuar Rusinë, jo vetëm duke përdorur metoda hibride, por duke shqyrtuar edhe një sulm fizik. Dhe kreu i këtij grupi nuk është Adolf Hitleri, por Volodymyr Zelensky me sloganet e tij naziste”, tha Lavrov në një intervistë.

Ministri rus përsëriti të njëjtat çështje në një takim të Komitetit për Bashkëpunim Ndërkombëtar dhe Mbështetje për Bashkatdhetarët Jashtë Vendit të Këshillit të Përgjithshëm të Rusisë së Bashkuar.

Në deklaratat e tij kryesore, Lavrov tha se “Evropa dhe Shtetet e Bashkuara ruajnë vijën e dominimit dhe përparimin e NATO-s në Lindje”, duke shtuar se “Aleanca e Atlantikut të Veriut vazhdon të diskutojë idenë e ‘dekolonizimit’ të Rusisë”.

“Vendet perëndimore duan të imponojnë rendin e tyre kudo, duke përfshirë Azinë Qendrore, Kaukazin Jugor dhe Ukrainën. Bashkimi Evropian mbështet politikat naziste të regjimit të Kievit, i cili shtyp banorët rusishtfolës të rajonit. Si pjesë e një zgjidhjeje paqësore, të drejtat e këtyre banorëve duhet të garantohen plotësisht”, shtoi Lavrov.