MANILA – Rubio: SHBA-ja e gatshme për të ndihmuar në përfundimin e luftës në Ukrainë

– Sekretari amerikan i Shtetit, Marco Rubio deklaroi sot se Shtetet e Bashkuara të Amerikës mbeten të gatshme të luajnë një rol konstruktiv, për të ndihmuar në përfundimin e luftës në Ukrainë, pas takimit me ministrin e Jashtëm rus Sergey Lavrov në kuadër të takimit të ASEAN-it në Manila, sipas “Reuters”.

Pas bisedimeve, Rubio tha se presidenti amerikan, Donald Trump e ka bërë të qartë se SHBA-ja është e gatshme të ndihmojnë në ndërmjetësimin e një marrëveshjeje, për t’i dhënë fund asaj që ai e quajti “një luftë të pakuptimtë”, nëse krijohet mundësia.

Ai tha se Uashingtoni ia ka përcjellë këtë mesazh Moskës, por nuk dha detaje mbi qëndrimin e Rusisë gjatë takimit.

Rubio e përshkroi takimin me Lavrov si “të mirë dhe të sinqertë”, por refuzoi të zbulojë çfarë u diskutua konkretisht.

Nga ana e tij, Ministria e Jashtme ruse deklaroi se Lavrov rikonfirmoi gatishmërinë e Moskës për një zgjidhje politike dhe diplomatike të konfliktit.

Sipas palës ruse, ai i tha Rubios se Rusia mbetet e angazhuar ndaj propozimeve të diskutuara nga Trump dhe presidenti rus Vladimir Putin gjatë takimit të tyre në Alaskë në gusht 2025.

Rubio theksoi se lufta ka shkaktuar pasoja të rënda, duke përmendur viktimat civile dhe sulmet ruse ndaj Kievit.

Ai tha se si Rusia, ashtu edhe Ukraina kanë interes për t’i dhënë fund luftës, por sfida kryesore mbetet gjetja e një marrëveshjeje, që të jetë e pranueshme për të dyja palët. /