Manipulimi i mediave të Ramës me “Kuvendin Kombëtar” të protestës

Të gjitha mediat e regjimit që kanë prej afro 50 ditësh që parashikojnë fundin, dështimin, perçarjen e protestës; sot janë barikaduar për të pompuar të njëjtën ngjarje: incidentet mes organizatorëve. Në fakt, këtë të shtunë në mesditë, disa nga pjesëmarrësit e rregullt në ato protesta, që në ditën e tyre më të mirë mblodhën në bulevard dhjetëra mijëra njerëz, u tubuan në Hotel Tiranë në një organizim që e vetëquajtën ‘Kuvendi Kombëtar qytetar’. Aty, ata jo vetëm që nuk kishin mandatin e të gjithë qytetarëve që kanë protestuar me moton “Ju erdhi fundi”, por nuk arritën të bënin bashkë edhe gjithë grupimet e larmishme të organizatorëve.

Por në mediat e regjimit këtij evenimenti Iu dha një hapësirë e madhe. Në fakt, jo si një përpjekje për organizim, por si një shkak për të demostruar se protesta po përçahet. Kështu televizioni kombëtar Top Channel, i kushtoi këtij evenimenti 2 kronika, ku binte në sy fjalia: “Kuvendi Kombëtar i protestës mbajti sot ditën e parë të punimeve, që u shoqërua nga disa episode tensionesh dhe përplasjesh”. Madje në një kronikë të veçantë iu kushtua rëndësi edhe një ish-deputeti qesharak si Selami Jenisheri. Për Topin incidenti me të qe një lajm me rëndësi kombëtare prandaj raportoi: “Në një prej tyre ishte protagonist ish-deputeti i Kuvendit të Shqipërisë, Selami Jenisheri. Ky i fundit u fut në sallë dhe u ul në karriget e para, ku ishin pozicionuar organizatorët. Pas pak çastesh, rojat e sigurisë hynë në sallë dhe e nxorën jashtë, por vetëm për momentin, pasi më pas Jenisheri u bind dhe u ul në fund të sallës duke dëgjuar”.

Të njëjtin lajm e konsideroi me rëndësi të veçante edhe Gazeta Tema, që e nxori në ballë të faqes. Ndërsa Report TV dhe Shqiptarja.com i kushtuan minuta dhe rreshta të tëra ngjarjes duke konstatuar: “Vetëm sherr dhe akuza mes pjesëmarrësve dhe ende të paqartë si bie Rama”. Edhe për Dritare.net interesant ishte titulli: “Nis Kuvendi i Parë Kombëtar Qytetar, tensione gjatë mbledhjes”.

Po t’i ndiqje me vëmendje dukej sikur ky tubim, nuk qe një shkëmbim normal mes njerëzish të lirë për të kuvenduar, por paraqitej si një produkt që rridhte nga vullneti i mbi 100 mijë protestuesve që kishin zgjedhur një përfaqësi që po prodhonte tensione dhe përçarje. Kaq mjafton për të kuptuar se kush qëndron pas gjithë këtij skenari.