Maqedonas plagoset rëndë me thikë në një sherr në Gjermani

Një debat verbal mes dy grupeve pranë sheshit të qytetit të Bad Segeberg-ut përshkallëzoi në mëngjesin e hershëm të së shtunës në një sherr masiv në rrugën Kirchstraße, gjatë të cilit një 23-vjeçar, banor i Bad Segeberg-ut me shtetësi gjermane, goditi me thikë një 24-vjeçar shtetas të Maqedonisë së Veriut, siç njofton Žurnal.

Incidenti ndodhi rreth orës 04:20 të mëngjesit të 26 shtatorit. Përveç maqedonasit, i cili u plagos rëndë, në sherr u lëndua edhe një 23-vjeçar shtetas irakian. Ndihmën e parë në vendngjarje e dhanë kalimtarët dhe ekipet e emergjencës, ndërsa policia gjermane përdori turnike me të cilën ia doli të ndalte gjakderdhjen e viktimës.

Shtetasi maqedonas u transportua me urgjencë në spital dhe iu nënshtrua një operacioni po atë mëngjes. Plagët e tij fillimisht u vlerësuan si kërcënuese për jetën, por mjekët më pas konfirmuan se jeta e tij ishte jashtë rrezikut, raporton Žurnal.

Pas ngjarjes, tre burra — përfshirë të dyshuarin kryesor — u larguan me makinë nga vendngjarja, por u lokalizuan më vonë në një klinikë lokale dhe u arrestuan përkohësisht: sulmuesi 23-vjeçar dhe dy shtetas gjermanë të moshave 22 dhe 23 vjeç, të cilët kishin marrë lëndime të lehta. Me urdhër të prokurorisë së Kiel-it, policia mori mostra gjaku nga pesë pjesëmarrës në sherr, të cilët më pas u lanë të mbrohen në liri.

Hetimet për rastin po i udhëheq policia kriminale e Bad Segeberg-ut, e cila u ka bërë thirrje të gjithë dëshmitarëve të mundshëm të paraqiten për të ndihmuar në zbardhjen e plotë të ngjarjes.