“Më ka kërcënuar ish-partnerët”, ish-e dashura e Chris Brown bën akuza tronditëse

Ish-e dashura e këngëtarit Chris Brown, Diamond Brown, ka bërë një sërë akuzash ndaj artistit në dokumentet e depozituara së fundmi në gjykatë, duke pretenduar se ai ka kërcënuar personat me të cilët ajo ka pasur lidhje pas ndarjes së tyre.

Diamond, 28 vjeç, e cila ka një vajzë katërvjeçare, Lovely, me këngëtarin 37-vjeçar, deklaroi në një dokument ligjor se marrëdhënia mes tyre ka përfunduar më shumë se dy vite më parë, por se Brown “ka qenë jashtëzakonisht i zemëruar” me të sa herë që ajo ka nisur një lidhje të re.

Sipas saj, Chris Brown ka bërë kërcënime me vdekje ndaj partnerit të saj të fundit, si dhe ndaj vëllait binjak të tij. Diamond pretendon gjithashtu se ka dijeni se kërcënime të tjera mund të jenë bërë përmes personave të tretë.

Ajo ka deklaruar se një situatë e ngjashme kishte ndodhur edhe me një tjetër burrë me të cilin ishte lidhur disa vite më parë.

“Jam e detyruar të jetoj me frikën se nuk mund të vazhdoj jetën time për shkak të zemërimit dhe inatit të Chris”, thuhet në deklaratën e saj ligjore.

Diamond pretendon gjithashtu se sjellja e këngëtarit ka qenë “ngacmuese, shqetësuese dhe jashtëzakonisht frikësuese” dhe se ai është përpjekur ta kontaktojë apo shqetësojë edhe përmes rrjeteve sociale.

Sipas saj, Brown ka pasur shpërthime ndaj saj në prani të vajzës së tyre dhe në një festë ditëlindjeje, gjë që ajo e konsideron të papërshtatshme dhe të dëmshme për fëmijën.

Diamond thotë se ka tentuar, përmes avokatit të saj, ta bindë Brown që të ndalojë këtë sjellje dhe se ka bërë përpjekje të shmangë depozitimin e një kërkese për urdhër mbrojtjeje për dhunë në familje.

Nga ana tjetër, avokati i Chris Brown duket se i ka mohuar pretendimet. Në një komunikim të përfshirë në dokumentet gjyqësore, avokati shkruan se Brown “i mohon këto akuza” dhe kërkon që Diamond të paraqesë detaje konkrete në mënyrë që pretendimet të mund të shqyrtohen.

Përveç akuzave për ngacmim, Diamond Brown ka kërkuar edhe rritje të konsiderueshme të mbështetjes financiare për vajzën e tyre. Në një deklaratë të depozituar më 1 tetor, ajo pretendon se Chris Brown nuk ka kërkuar të takojë vajzën Lovely gjatë gjashtë apo shtatë muajve të fundit.

Diamond deklaron se të ardhurat e saj janë rreth 1,500 dollarë në muaj, ndërsa pretendon se Brown nuk ka dhënë dokumentet financiare të kërkuara gjatë procesit gjyqësor. Ajo po kërkon rreth 45,595 dollarë në muaj në mbështetje financiare për fëmijën.