Mendel: Më ndaluan të hyj në Parlamentin Evropian, faji është i sanksioneve të Zelenskit

Ish-zëdhënësja e presidentit ukrainas Volodymyr Zelensky, Iuliia Mendel, thotë se iu ndalua hyrja në ndërtesën e Parlamentit Evropian pikërisht ditën kur do të mbante fjalimin e saj — dhe për këtë fajëson sanksionet e vendosura ndaj saj nga vetë Zelenski.

Lajmin e njoftoi vetë ajo më 16 shtator, në një postim në rrjetin social X. “Në ditën e fjalimit tim, mua më ndaluan të hyj në Parlamentin Evropian. Këtë e lidh drejtpërdrejt me sanksionet e Zelenskit. Por fjalimi do të zhvillohet gjithsesi,” shkroi Mendel. Ajo e mbajti fjalimin e planifikuar virtualisht.

Sanksionet ishin vendosur ndaj saj më 13 shtator nga presidenti ukrainas. Mendel, e cila vitet e fundit është bërë një kritike e hapur e Zelenskit dhe ka përsëritur disa herë narrativa të propagandës ruse, u gjobit me një paketë masash që ia heqin çmimet shtetërore, i ndalojnë nxjerrjen e kapitalit nga Ukraina dhe i ngrijnë asetet e saj.

Po atë ditë kur u njoftuan sanksionet, Mendel reagoi ashpër, duke i quajtur sanksionet kundër qytetarëve ukrainas “antikushtetuese” dhe duke thënë se Zelensky i përdor ato kundër kujtdo që mbron paqen. Ajo pretendoi gjithashtu se po përgatiteshin akuza për “tradhti të lartë” kundër saj për shkak të intervistës së dhënë podkasterit amerikan Tucker Carlson — intervistë në të cilën, që në maj, ajo e kishte quajtur Zelenskin “diktator” dhe “pengesa më e madhe për paqen”.

Në Bruksel, Mendel ishte ftuar në një ngjarje të organizuar në margjina nga partia gjermane e ekstremit të djathtë Alternativa për Gjermaninë (AfD). Anëtarët e kësaj partie kanë kritikuar hapur mbështetjen ushtarake dhe financiare të Gjermanisë dhe BE-së për Ukrainën, dhe ftesa e bërë Mendel shkaktoi reagime të forta në rrjetet sociale.

Burimi: Kyiv Independent