“Migrena dhe dhimbjet kronike mund të lehtësohen pa ilaçe”? Ja çfarë thotë studimi

Dhimbjet e kokës nga migrena apo dhimbjet menstruale mund të lehtësohen edhe përmes aktivitetit fizik, pa pasur nevojë për ilaçe në disa raste.

Studiuesit e Universitetit të Adelajdes kanë analizuar 157 rishikime sistematike, me mbi 2 700 prova klinike dhe më shumë se 220 mijë pjesëmarrës. Ata panë se aktiviteti fizik dhe ushtrimet mund të ndihmojnë në reduktimin e dhimbjeve të ndryshme, nga migrena dhe dhimbjet menstruale deri te dhimbjet kronike.

Në një shkallë nga zero në dhjetë, aktiviteti fizik e uli dhimbjen mesatarisht me rreth 1.1 pikë.

Por më shumë ushtrime nuk do të thotë domosdoshmërisht rezultate më të mira. Studimi tregon se aktiviteti me intensitet të ulët mund të jetë më efektiv, ndërsa programet që zgjasin rreth 12 javë dhanë rezultate më të mira se ato më të gjata.

Studiuesit theksojnë gjithashtu se më pak se 120 minuta aktivitet fizik në javë mund të jenë të mjaftueshme për të sjellë përfitime.

Megjithatë, ushtrimet nuk janë një zgjidhje universale. Ekspertët kërkojnë udhëzime më të qarta për të përcaktuar se cili aktivitet është më i përshtatshëm për secilin pacient.