Moggi sulmon hetimin ndaj arbitrave: Po përsëritet “Calciopoli”, duan të godasin Marotta

Luciano Moggi ka dalë me deklarata të forta mbi hetimin e fundit që prek botën e arbitrave në futbollin italian, duke e lidhur situatën aktuale me skandalin e famshëm të “Calciopoli”. Në një intervistë për “Libero”, ish-drejtuesi i Juventusit ka ngritur akuza të drejtpërdrejta për një fushatë që, sipas tij, synon figurat kryesore të sistemit aktual.

“Duan t’i bëjnë gropën Marotta, sepse është më i miri, – është shprehur Moggi, duke shtuar se kjo i kujton atë që ka përjetuar vetë: – Thonin se isha drejtori më i mirë në botë, se me mua fitohej, ndërkohë po më eliminonin”.

Ai e përshkruan situatën si një rikthim të dinamikave të së kaluarës: “Jemi në një ripërsëritje të Calciopoli-t, dikush do të dalë në pah duke duke hetuar futbollin. Nga Calciopoli nuk doli asgjë”. Sipas tij, ndryshimi kryesor me atë periudhë është struktura e klubit që ka Marotta: “Marotta ka një shoqëri të bashkuar pas vetes”.

Moggi rikujton edhe ndryshimet historike në futbollin italian pas largimit të figurave të mëdha të Juventusit të asaj kohe: “Pas vdekjes së avokatit Agnelli, doktor Umberto dhe avokatit Chiusano, gjithçka ndryshoi”.

Ai shton se ka qenë shpesh në shënjestër: “Me sa duket isha i padurueshëm, por jo vetëm unë, e gjithë ‘triada’ (Moggi, Giraudo, Bettega), ndoshta disa edhe më shumë se unë. Personalisht nuk kam qenë kurrë te Fiat…”