MOSKË – Rusia pretendon rrëzimin e 605 dronëve ukrainas

MOSKË, 6 gusht /ATSH-AFP/ – Rusia njoftoi se sistemet e saj të mbrojtjes ajrore kanë rrëzuar 605 dronë ukrainas gjatë natës, në një nga sulmet më të mëdha me mjete ajrore pa pilot që nga fillimi i luftës.

Sipas Ministrisë ruse të Mbrojtjes, dronët u interceptuan mbi më shumë se 20 rajone të vendit dhe mbi gadishullin e Krimesë, të aneksuar nga Moska.

Një nga zonat e goditura ishte rajoni i Tverit, rreth 180 kilometra në veriperëndim të Moskës.

Autoritetet lokale thanë se një qendër logjistike e kompanisë së tregtisë elektronike “Wildberries” pësoi dëmtime të lehta pasi mbetjet e një droni ranë mbi ndërtesë.

Sipas guvernatorit Vitali Koroliov, nuk pati të lënduar.

Ndërkohë, guvernatori i rajonit të Jaroslavlit, Mikhail Jevrajev, e cilësoi sulmin si më masivin e regjistruar ndonjëherë në këtë zonë.

Ai tha se 92 dronë u rrëzuan mbi rajon, ndërsa mbetjet e tyre shkaktuan zjarre në disa banesa dhe dëmtuan automjete.

Sipas autoriteteve ruse, që nga mesi i korrikut Ukraina ka goditur rreth 20 objekte të kompanisë “Wildberries” në rajone të ndryshme të Rusisë dhe në Krime.

Platforma e njohur e tregtisë online konsiderohet si ekuivalenti rus i “Amazon”.

Lufta mes Rusisë dhe Ukrainës vazhdon të përshkallëzohet edhe në fushën e sulmeve me rreze të gjatë veprimi.

Më shumë se katër vjet pas nisjes së ofensivës së plotë ruse, përpjekjet diplomatike mbeten të bllokuara, ndërsa të dyja palët po intensifikojnë përdorimin e dronëve dhe raketave, duke rritur edhe numrin e viktimave dhe dëmeve në zonat civile./  /Ad.Ab./ a.jor.