Ndërtimi, sektori më i varur nga kreditë, 43% e firmave kanë hua

Ndërtimi mbetet sektori më i ekspozuar ndaj huamarrjes në ekonominë shqiptare. Sipas vrojtimit të Bankës së Shqipërisë për gjashtëmujorin e dytë të vitit 2025, 43% e ndërmarrjeve të ndërtimit deklarojnë se kanë aktualisht një hua për të paguar, përqindja më e lartë ndër të gjithë sektorët e ekonomisë.

Pas ndërtimit renditet tregtia, ku 40% e bizneseve kanë kredi, industria me 39%, ndërsa sektori i shërbimeve ka nivelin më të ulët, me vetëm 26% të ndërmarrjeve huamarrëse.

Banka e Shqipërisë evidenton gjithashtu se ndërtimi ka barrën më të lartë të huasë në raport me kapitalin. Rreth 27% e ndërmarrjeve të këtij sektori deklarojnë se vlera e huasë është e barabartë ose më e madhe se kapitali i tyre. Për krahasim, kjo peshë është 20% në tregti, 16% në shërbime dhe 13% në industri.

Ngarkesa financiare është rritur edhe gjatë vitit. Në gjashtëmujorin e parë të vitit 2025 vetëm 18% e firmave të ndërtimit raportonin hua sa kapitali ose më të larta, ndërsa në gjashtëmujorin e dytë kjo peshë u rrit në 27%.

Kjo tregon se një pjesë e konsiderueshme e kompanive të ndërtimit mbështeten fuqishëm te financimi bankar për të mbuluar kostot dhe për të zhvilluar projektet e tyre, në një kohë kur sektori vijon të jetë edhe ndër më aktivët për nga shitjet.