Ndeshja e fundit në vendlindje si trajner i kombëtares, Deschamps: S’ka kohë për nostalgji, të fokusuar te Botërori – Telesport

Mbrëmja e së hënës në stadiumin “Villeneuve-d’Ascq” ishte një rast i veçantë për trajnerin e kombëtares së Francës, Didier Deschamps. Kjo ishte ndeshja e tij e fundit në tokën franceze si trajner i kombëtares, pasi ai do të largohet pas Kupës së Botës.

Trajneri i Francës mori shumë mesazhe dashurie nga mbështetësit gjatë fitores 3-1 të “Les Bleus” ndaj Irlandës së Veriut (tri gola të Michael Olise). Pavarësisht homazheve të ngrohta, ai këmbënguli se kjo nuk është koha për emocione.

“Në një farë mënyre, po kompletohet një cikël i plotë. Ka pasur shumë mesazhe dhe shenja dashurie, të cilat janë shumë të këndshme. Që kur arrita në Clairefontaine, kam bërë shumë gjëra për herë të fundit,” tha Deschamps për TF1.

Pas katërmbëdhjetë vitesh në krye të ekipit kombëtar francez, Didier Deschamps e njeh rëndësinë e momentit, por refuzon të mbingarkohet nga nostalgjia me Kupën e Botës që po afron me shpejtësi. Ai kërkon që të gjithë të jenë të fokusuar tek ky event.

“Asnjë nostalgji, pasi ende kemi ndeshje për të luajtur. Kemi një botëror përpara që duhet të luajmë dhe të shkojmë sa më larg, apo ta fitojmë atë. Aty duhet të fokusohemi dhe të bëjmë më të mirë”, tha francezi.

“Kjo miqësore tregon se po i afrohemi gjendjen optimale dhe duhet ta shfrytëzojmë këtë moment. Ky ekip mund të bëjë sërish mirë, si në dy edicionet e fundit që ka shkuar deri në fund”, deklaroi Didier Deschamps pas fitores.