“Ndikimi sllav gati i frikshëm në Shqipëri”, Andoni: Shërbimi ynë i prapambetur, AKI më e sofistikuar

Analisti Ben Andoni ka ngritur shqetësimin për atë që e cilëson si prani dhe ndikim të fortë sllav në Shqipëri, ndërsa ka bërë një krahasim mes aftësive të shërbimeve inteligjente shqiptare dhe Agjencisë së Kosovës për Inteligjencë (AKI).

I ftuar në Euronews Albania, Andoni u shpreh se AKI është më e avancuar dhe më e sofistikuar në evidentimin e lidhjeve dhe ndikimeve që vijnë nga Serbia, ndërsa kritikoi kapacitetet e shërbimit informativ në Shqipëri.

Sipas tij, nëse analizohet më në thellësi situata në vend, mund të evidentohen ndikime sllave në nivele që ai i konsideron shqetësuese.

“AKI-ja po i jep mësim Shqipërisë, sepse më vjen keq ta them, në Shqipëri, po të penetrosh pak më thellë, shikon ndikime sllave gati të frikshme në vendin tonë”, deklaroi Andoni.

Analisti kritikoi gjithashtu mënyrën se si strukturat shqiptare të inteligjencës i identifikojnë dhe i trajtojnë këto ndikime. Sipas tij, problemi nuk qëndron te apatia, por te kapacitetet e pamjaftueshme për t’i evidentuar ato.

“Më vjen keq që pjesa e shërbimit tonë nuk është apatike, por është jashtëzakonisht e prapambetur për ta parë, ndërsa AKI-ja, kini parasysh, është më e sofistikuar sesa shërbimi ynë informativ për sa i përket lidhjeve me Serbinë”, tha Andoni.