Ndotja e ajrit nga termoelektranat e Kosovës, IKSHPK tregon pasojat afatshkurta dhe afatgjata

Instituti Kombëtar i Shëndetit Publik ka bërë të ditur se ndotja e ajrit paraqet një nga sfidat më të mëdha mjedisore, shëndetësore dhe klimatike në vendin tonë, e cila konsiderohet si emergjencë globale e shëndetit publik.

Instituti Kombëtar i Shëndetit Publik ka bërë të ditur se ndotja e ajrit paraqet një nga sfidat më të mëdha mjedisore, shëndetësore dhe klimatike në vendin tonë, e cila konsiderohet si emergjencë globale e shëndetit publik.

IKSHPK thekson se termoelektranat e Kosovës (A dhe B) që përdorin thëngjillin si burim energjie mund të lëshojnë në atmosferë substanca të dëmshme si: ozoni (O3), oksidet e azotit (NOx), dioksidi të squfurit (SO2), dhe materie grimcore me madhësi PM10 dhe PM2.5.

Sipas raporteve të Institutit Hidrometeorologjik të Kosovës (IHMK) dhe Agjencisë për Mbrojtjen e Mjedisit (AMMK) në Kosovë, sektori i energjetikës është përgjegjës për 40% të emisioneve ndotëse të ajrit, ku lirimi i tymit dhe pluhurit, rritë përqendrimin e grimcave ajrore fluturuese për një kohë më të gjatë në ambientin rrethues.

IKSHPK më tej njofton se më shumë se 90% e tyre kur absorbohen nga mukoza e sistemit të sipërm respirator, ndikojnë në rritjen e incidencës së infeksioneve respiratore tek fëmijët, të moshuarit, shtatzënat, të sëmurët kronik dhe punëtorët që punojnë në ambiente të hapura.

IKSHPK ka treguar efektet afatshkurtra dhe ato afatgjata si pasojë e aero-ndotjes mund të jenë shkaktarë të ç’rregullimeve në shumë sisteme dhe organe si:

Rritjen e mortalitetit të popullatës së ekspozuar.

Cilësia e dobët e ajrit është gjithashtu e lidhur me sëmundjet akute dhe kronike të frymëmarrjes, siç janë bronkiti dhe përkeqësimi i astmës

Ndikimit iritues në sy dhe mukozat e sistemit respirator dhe funksionet ventiluese të mushkërive.

Ndikimit toksik në sistemin kardiovasular.

Ndikimit negativ në cilësinë e jetës së qytetarëve dhe

Ndikimit kancerogjen.

Instituti Kombëtar i Shëndetësisë Publike të Kosovës tutje thekson se ka përcjellë me vëmendje shkarkimet e ndotësve nga termoelektranat A dhe B, ku ditëve të fundit është parë një ndotje enorme nga tymtarët e Obiliqit.

Duke analizuar situatën aktuale Instituti Kombëtar i Shëndetësisë Publike të Kosovës, propozon:

A. Masat afatshkurtra (urgjente) për përmirësimin e menjëhershëm të situatës:

Monitorimi në kohë reale i ndotjes dhe publikimi transparent i të dhënave për qytetarët nga KEK-u.

Monitorimi transparent dhe i vazhdueshëm i filtrave të termocentraleve (kontrolli i rregullt teknik dhe sanksione nese nuk punojnë).

Inspektime të shpeshta nga inspektorët e mjedisit dhe gjoba të larta për tejkalim të normave.

Instalimi i teknologjive për desulfurizim dhe përdorimi i sistemeve për reduktimin e NOx.

Modernizimi i pajisjeve ekzistuese.

B. Masat për mbrojtjen e shëndetit publik:

Krijimi i një sistemi të integruar të informatave në situata emergjente.

Promovimi i rëndësisë së cilësisë se ajrit si përcaktues i shëndetit dhe mirëqenjes së popullatës.

Monitorimi dhe raportimi i rregullt i cilësisë së ajrit.

Ngritja e zonave gjelbruese në mes të zonës industriale dhe asaj të banimit.

Vendosja e standardeve për emetimet industrial.

Zbatimi i ligjeve për mbrojtjen e mjedisit

Ekspertët e Institutit Kombëtar të Shëndetësisë Publike të Kosovës paralajmërojnë dhe alarmojnë se po qëse nuk merren masa urgjente, do të ketë efekte negative në dëmtimin e shëndetit dhe rritja e vdekshmërisë nga të gjitha shkaqet e sidomos nga sëmundjet kardiovaskulare dhe respiratore do të jetë shqetësuese. /Telegrafi/