Ndryshimet klimatike po shtojnë sëmundjet, ekspertët: Duhen masa urgjente

Vdekjet nga i nxehti, përhapja e sëmundjeve infektive dhe pasiguria ushqimore janë në rritje në Europë, ndërsa reagimi politik dhe ndërgjegjësimi publik

Vdekjet nga i nxehti, përhapja e sëmundjeve infektive dhe pasiguria ushqimore janë në rritje në Europë, ndërsa reagimi politik dhe ndërgjegjësimi publik mbeten prapa. Ky është përfundimi i raportit të ri i Lancet për ndryshimet klimatike dhe shëndetin.

Sipas raportit, ndikimet e ndryshimeve klimatike në shëndet po përshpejtohen, ndërsa masat për t’i përballuar nuk po ecin me të njëjtin ritëm. Në periudhën 2015–2024, pothuajse të gjitha rajonet europiane kanë regjistruar rritje të vdekjeve të lidhura me temperaturat e larta, krahasuar me vitet 1991–2000. Paralajmërimet për valë të të nxehtit janë rritur me 318%.

Ekspertët thonë se ekspozimi i shtuar ndaj temperaturave të larta po çon në më shumë raste sëmundjesh nga i nxehti, çrregullime të gjumit, përkeqësim të sëmundjeve kronike dhe probleme gjatë shtatzënisë. Ndërkohë, ndotja e ajrit vazhdon të lidhet me rritje të sëmundjeve të zemrës dhe mushkërive.

Raporti evidenton edhe pasojat indirekte, si rritja e pasigurisë ushqimore për shkak të thatësirave dhe temperaturave në rritje. Vetëm në vitin 2023, mbi një milion persona më shumë në Europë janë prekur nga mungesa e ushqimit, krahasuar me mesataren e viteve 1981–2010.

Të gjendur në këto kushte ekpsertët bëjnë thirrje për veprim urgjent, duke theksuar se investimet në energji të pastër, përmirësimi i cilësisë së ajrit dhe mbrojtja e grupeve më të rrezikuara mund të sjellin përfitime të menjëhershme për shëndetin e popullatës.