Nga Anthony Gordon te 21-vjeçari 100 milionë eurosh, zbulohet lista me anësorët që po ndjek Barcelona

Përveç transferimit të një qendërmbrojtësi dhe një qendërsulmuesi, Barcelona do të transferojë dhe një sulmues anësor gjatë merkatos së verës. Mundo Deportivo ka zbuluar disa nga emrat që po ndjekin drejtuesit katalanas, dy prej tyre ka qenë më parë pjesë e ekipeve të moshave të Barcelonës.

Emri i parë në listë është ai Anthony Gordon, i cili ka bërë një sezon fantastik te Newcastle, por ka një çmim të vështirë për t’u përballuar nga Barcelona, mbi 80 milionë euro.

Një tjetër emër është ai i zbulimit të këtij sezoni në La Liga, Victor Munoz, 22 vjeç, një produkt i La Masia, por më pas u bë pjesë e Real Madrid. Verën e kaluar u transferua te Osasuna për 5 milionë euro, por klubi madrilen mbajti 50% të të drejtave të tij. Për Munoz nuk përjashtohet as mundësia e rikthimit te Reali, për 8 milionë euro këtë verë.

Klauzola e largimit të tij te një ekip tjetër është 40 milionë euro. Një tjetër emër në listë është ai i Jan Virgili, i cili ka shkëlqyer në sezonin e tij të parë të Mallorca, ku u transferua verën e kaluar duke lënë pikërisht Barcelonën. Emra të tjerë janë, ylli belg i Ajax-it, Mika Godts, marokeni i Betis, Abde si dhe norvegjezi i Benfica, Andreas Schjelderup, i cili ka një klauzolë largimi 100 milionë euro.